E fundit!

07:09 Sociale

Kthjellime dhe vranësira/ Moti për ditën e sotme

Ditën e enjte vendi ynë do të jetë nën ndikimin e masave a...

Shkëlqimi i rremë i Top Music Awards

25 Qershor 2016, 16:46, Aktualitet CNA

Të flasësh nga tryezat e një salle konference glamour, të premtosh, zmadhosh e mburresh në delir pa fre, se ajo çfarë po pergatitet në skenën e Pallatit të Kongresve do të jetë ngjarja më e re, më e madhe muzikore e vitit në vend është tjetër gjë, dhe t?ia dalësh ta realizosh vërtetë ashtu si duhet një eveniment të tillë është krejt tjetër gjë.

Të bësh zhurmë mediatike me ?skandale? sipas filozofisë mjafton të përflitesh qoftë edhe për keq, të shtrosh tapete të kuq, të vishesh gjithë xixa e shkëlqim, pra të mendosh më shumë për dukjen, apo gunën, nuk mjafton për të sjellë në ekranin e një televizioni me traditë serioze, siç është Top Channel, një program të madh, të vërtetë muzikor, aq më shumë kur pretendohet të jetë ngjarja më e madhe e vendit.

Të hedhësh shuma marramendëse parash, po aq pa fre, për të realizuar një skenë luksoze prap nuk mjafton e kurrë s?ka për të mjaftuar në një projekt ku mungon ajo çfarë është më e rëndësishmja: përmbajtja, boshti, vizioni regjisorial, fjala.

?Nuk e kam fare idene se çfarë do të them?- ishte gjëja e parë që tha Ledion Liço në tapetin e kuq, ku më shumë se për përmbajtjen e projektit që mbante emrin e tij si autor, po fliste e entuziazmohej për veshjet e garderobës së tij dhe të fejuarës së tij.

Më shumë se për kostumin e vetëm që i bënte ende, Ledioni, duhej të shqetësohej për tapetin e kuq që dukej si një fushë e kuqe e hapërdarë, ku të ftuarit parakalonin të çoroditur, të paorientuar. Po aq të çorganizuar sa ç?ishin dhe dy moderatorët Xhemi Shehu dhe Isli Islami, që me gjithë përpjekjet e tyre zor se mund të vendosnin rregull pa një orientim nga regjia qëndrore që herë pas here dukej sikur as nuk ekzistonte fare e sikur gjithçka po ndodhte aty për aty live, pa një skaletë të mirëpërcaktuar.

Duhej të shqetësohej për hyrjen e reklamave vend e pa vend si shpëtimi i vetëm për hapësirat boshe, apo gropat, siç i quajnë ata që merren me television, që krijoheshin në çdo moment.

Mund të ishte e justifikueshmë deri diku kjo çoroditje në tapetin e kuq, ku ndoshta provat mund të mos kenë qenë dhe aq të mjaftueshme? por gropat u ndjenë edhe brenda në sallën e Pallatit të Kongreseva, sapo nisi kjo natë që u shit si më magjikja. E këtu s?është fjala thjesht për gropat në mes të skenës, si pjesë e skenografisë, që si koncept ishte i bukur por që u bë pis prej turmave të njerëzve gjithashtu të paorganizuar, të pakuruar e djersitur në maksimum, por është fjala për gropat e kohës televizive e dinamikës së një spektakli live. Reklamat ishin përsëri shpëtimi që s?ishte në fakt aspak shpëtim. E kjo është e pafalshme për një projekt për të cilin u punua me muaj të terë, e për të cilin Pallati i Kongreseve u blloku për ditë e ditë të tëra. Pra kohë për përgatitje e prova ka pasur mjaftueshëm. E megjithatë hyrje- daljet në skenë e të ftuarve që shpallnin çmimet ishin edhe më të paorganizuara se ato hyrjet mbi tapetin e kuq.

Ledioni, si autor, Sara si Producente Ekzekutive e Lori Hoxha si Producente, më shumë se për paradën e shkëlqimin e tyre mbi tapet, duhej të shqetësoheshin për mungesën e këngëtarëve që e braktisën këtë projekt televiziv, muzikor ku kryefjalën duhet ta kishte pikë së pari muzika, këngëtarët dhe vlerat që ata kanë në treg. Lista e këngëtarëve të pranishëm linte shumë për të dëshiruar. Ishe shumë më e varfër se lista e artistëve që e refuzuan. Edhe pse mund të kenë klikime, që në këto kohë blihen fare kollaj, një pjesë e mirë e atyre artistëve që performuan e morën çmime mbrëmë në Top Awards janë shumë larg përfaqësimit të muzikës së vërtetë shqiptare, qoftë dhe asaj moderne.

Në një program live, nëse pretendohet se do të këndohet live, duhet të këndohet live dhe jo siç ndodhi në performancën e Era Istrefit që nisi për live e bitisi me cd nga pas, për ta shpëtuar prej dështimit e zhgënjimit të fansave që janë dashuruar pas klipeve të saj, zhgënjim që do të ishte edhe më i rëndë sesa ai kur e dëgjuan të fliste në gjithë herët që doli për të marrë çmimet e shumta që ishin rezervuar për të, aq sa do të kishtë qenë më mirë që ky të quhej Top Music Era e pse jo dhe Ledri.

Ishte e dukshme, ashtu siç e theksoi me shumë mençuri dhe Sokol Balla, i pari dhe i vetmi ishte Alban Skënderaj, ai që elektrizoi sallën mbrëmë, çka e bëri të qartë se vërtetë njerëzit mund të kërcejnë e dëfrejnë me muzikën e tregut të çoroditur të këtyre kohëve, por muzika dhe këngëtari i vërtetë, mbetet ai që u shijon deri në deje.

Fati i mirë, i vetëm i Top Music Awards ishte e shkuara, historia që lidhej me kohën kur në Top Channel mendohej për punën e jo për gunën, që lidhej me të parin Top Fest, e me fituesin e saj, Alban Skënderajn.

Ajo çfarë u tha e u pa në klipin e bërë enkas për të, muzika që ai këndoi, pas marrjes së çmimit të madh, do të ishte grand finalja që do të sfumonte gjithçka të bërë keq në këtë spektakël. Do të sfumonte dhe arrogancën e Ledionit në shpërthimin e tij ndaj Noyzit, edhe deliret, thashethemet, performancat e dobëta, organizimin e çorganizuar etj, etj

Por jo, grand finale do të ishte Era me CD e saj. Sepse e tashmja në Top Channel është Era dhe shokët e saj. Sepse e tashmja për producentët dhe autorët e Top Music Award është shkëlqimi i rremë.

Urojmë që Alban Skënderja t?ua ketë shkundur mbrëmë paksa xixat./citynews