Raporti i Qendrës Evropiane: Politika shqiptare ndër më të korruptuarat në planet

15 Shtator 2015, 07:33, Aktualitet CNA

Pas raportit sekret dhe për përdorim të brendshëm të OSBE, në të cilin bëhej një përshkrim i elementeve të inkriminuar në Parlament, politika shqiptare ka marrë një tjetër goditje të fortë. Qendra Evropiane e Grumbullimit të të Dhënave Online, e njohur si ?Numbeo?, në një raport të fundit mbi indeksin e krimit dhe korrupsionit, e klasifikon elitën politike shqiptare si një ndër udhëheqjet më të korruptuara në planet. Sipas këtyre të dhënave, vetëm në tremujorin e fundit indeksi i korrupsionit është rritur me 1.25 pikë.

Raporti më i fundit i kësaj organizate u publikua në muajin qershor dhe sipas të dhënave, korrupsioni në Shqipëri kuotohej me 80 pikë, ndërkohë që në raportin e publikuar tani, niveli i indeksit ka shkuar në 81.25, duke pësuar një rritje të lehtë. Por niveli më i lartë i korrupsionit shihet në Tiranë me një indeks prej 83.62 pikësh, duke nënkuptuar se kjo gjë ndodh në administratë dhe në klasën politike. ?Numbeo?, është një organizatë e ngritur nga një prej themeluesve të ?Google?, e cila grumbullon informacione zyrtare nga të gjitha shtet e botës dhe më pas përcakton një indeks mbi krimin, ekonominë, korrupsionin, mirëqenin, trafikun, e shumë fusha të tjera. Ajo shërben si vend referimi për shumë raporte dhe agjenci botërore. Por, duke bërë një krahasim të nivelit të korrupsionit me të gjitha shtetet e botës, Shqipëria ndodhet mes vendeve afrikane dhe atyre aziatike. Më konkretisht, me të njëjtin nivel korrupsioni janë edhe Libia, Pakistani, Peruja, Maroku dhe mjaft vende të tjera. Për secilin shtet ka një vlerësim me pikë nga 0-100, ku sa më e lartë të jetë kjo shifër, aq më i lartë është dhe niveli i krimit, korrupsionit apo i treguesve të tjerë. Sipas agjencisë, në rastin e korrupsionit, shtet me mbi 80 pikë renditen mes atyre me nivel tepër të lartë korrupsioni. Në këtë kategori bëjnë pjesë kryesisht shtetet afrikane, aziatike apo amerikano-jugore, por që mesa duket mes tyre ndodhet dhe vendi ynë. Nga ana tjetër shtetet me nivelin më të ulët të korrupsionit janë SHBA, Japonia dhe më pas një pjesë e madhe shtetesh të BE. Ndërsa sa i përket rajonit, vendet me nivelin më të lartë të korrupsionit janë Serbia, Shqipëria dhe Bosnja.