FULLANI NUK DUHET TË DORËHIQET

5 Gusht 2014, 10:15, Aktualitet CNA

Nga Erget Cenolli

Nëse do të dorëhiqej kjo do të propagandohej si një akt qytetarie nga ana e tij. Në të vërtetë Fullani duhet të shkarkohet.
Marim si shembull arsimin; nëse dy nxënës adoleshentë do të rriheshin 1 metër larg oborrit të shkollës, i pari që do të shkarkohej ishte drejtori i kësaj shkolle. Ndërsa Fullanit i kanë humbur miliarda dhe përsëri, jo vetëm mbahet në punë, por edhe lejohet të bëjë emërtesa në drejtorët e departamenteve. Kjo është e pakuptimtë dhe jo vetëm antiligjore , por edhe anti natyrës njerëzore. Edhe nëse nuk ka gisht në vjedhjen e lekëve, çka do të dalë nëpërmjet hetimeve, Guvernatorit i duhet të shkarkohet sepse nuk ka menaxhuar si duhet, bile shumë keq, bankën apo institucionin të cilin e drejton. Do t?i falej me një vërejtje në kartelën e regjistrit, nëse do të ishte një fillestar në detyrë, me pak muaj përvojë, ndërsa një njeriu me kaq përvojë mbi shpinë, me profesion economist, drejtues në një bankë të nivelit të dytë, drejtues prej 10 vitesh në Bankën Qëndrore të një shteti; dhe të të vidhen në mes të ditës lekët, kjo tregon një paaftësi totale në menaxhim.
Ndaj them se, Guvernator Fullani nuk duhet të dorëhiqet, ai duhet të shkarkohet. Madje ai duhej të ishte shkarkuar menjëherë sa u konstatua vjedhja. Edhe nëse do të ishte e vërtetë që ai vetë e kishte zbulauar megavjedhjen, gjë që u hodh poshtë nga media, përsëri duhet të shkarkohet në vend, pasi një drejtues banke as nuk numëron lekë, as nuk kontrollon nëpunësit kur hyjnë e dalin nga banka, një gubernator përgjigjet për menzhim, ky menazhim ësht bërë keq e tukeq, të paktën 4 vitet e fundit, ndaj organi më i lartë që e mbikëqyr dhe e urdhëron, duhet ta shkarkojë në vend.
E dyta, Fullani duhet të shkarkohet menjëherë pasi, nëse do të ketë gisht në vjedhje, çka e përsëris se, do ta vërtetojë hetimi, duke qëndruar në detyrë ai do të fshehë një pjesë të mirë të gjurmëve.
Siguria e bankës dhe e lekut të popullit shqiptar nuk cënohen duke hequr, por cënohen duke e lënë Fullanin ende në detyrë.
Si përfundim dua të theksoj edhe njëherë, se Parlamenti i SHqipërisë edhe pse është me pushime , duhet të mbledhë 140 deputetët e popullit dhe këta duhet të përgjigjen dhe të vijnë menjëherë, sepse është vjedhur paraja e votuesve të tyre ( të çdo karahu qofshin), duke votuar me konsensus të plotë shkarkimin e menjëhershëm të Guberantorit të Përgjithshëm të Bankës së Shqipërisë me motivacionn: Për menaxhim të dobët të lekut të popullit shqiptar.
Nëse nuk e bën këtë, Parlamenti tregon se nuk ka përgjegjësi dhe detyrim ndaj votuesve, tregon se Parlamenti Shqiptar, ndaj votuesve të tij ve në praktikë fjalën e urtë popullore: O popull, kalova lumin, të dhjefsha (mender) kalin!!!