E fundit!

14:17 Politikë

Reforma Territoriale/ Berisha paralajmëron Ramën: Do ngrejmë Shqipërinë në këmbë

Kreu i PD-së Sali Berisha ka folur për shtyrjen e afatit p...

P/ligji për barnat, Farmacistët dhe distributorët kundër

18 Korrik 2014, 11:14, Politikë CNA

Urdhëri i Farmacistit dhe përfaqësues të distributorëve farmaceutikë u shprehën kundër p/ligjit të barnave që po shqyrtohet në komisionet parlamentare. Të thirrur në një seancë dëgjimore në Komisionin parlamentar të Shëndetësisë, distributorët janë shprehur se ky draft ka shumë problem, përfshi këtu edhe mungesën e garancive për sigurinë e barnave.

Distributorët farmaceutikë kanë theksuar se projektligji nuk krijon transparencë dhe nuk tregon afatet për regjistrimin e barnave, gjë kjo që rrezikon futjen e barnave të paregjistruara të falsifikuara.

?Projektligji për barnat nuk krijon transparencë, nuk tregon afatet për regjistrimin e barnave që mund të shkojë edhe 3 vjet. Në emër të nevojave madhore rrezikohet që në Shqipëri të hyjnë barna të paregjistruara, të falsifikuara. Kërkojmë që çmimi i referencës së barnave të importit, të jetë mesatarja e 5 shteteve të rajonit dhe të realizohet automatikisht me sistem kompjuterik?, ishin disa nga shqetësimet e shprehura nga distributorët.

Një tjetër pikë ku çalon projektligji sipas përfaqësuesit të distributorëve farmaceutikë Gramoz Dudushi është mungesa e transparencës.

?Ligji nuk ka transparencë, ka probleme konceptuale, dhe nuk i përmbahet direktivave që japin siguri. Më kryesorja nuk tregon afatet e regjistrimit të barnave, gjë që rrezikon futjen e barnave të paregjistruara dhe falsifikuara në vendin tonë?, u shpreh Dudushi.

Ndërsa Shoqata e Farmacistëve bën me dije se me ministrin e Shëndetësisë Ilir Beqaj janë takuar vetëm një herë.

?Me ministrin e Shëndetësisë jemi takuar vetëm një herë dhe 90 % e propozimeve tona nuk janë marrë parasysh?, ka deklaruar përfaqësuesi i Shoqatës së Farmacistëve Roland Xhafaj.

Ai i cilësoi kërkesat e tyre në përputhje me direktivat evropiane.

?Projektligji është i përgjithshëm dhe sipërfaqësor, nuk i përmbahet kritereve objektive, atyre jo diskriminuese dhe nuk përmban as detyrat e autoriteteve?, theksoi Xhafaj.

Presidentja e Urdhrit të Farmacistit Diana Toma, u shpreh se ministria duhet të ishte konsultuar me grupet e interesit gjatë hartimit të projektligjit.

?Me ligj ministria duhej te konsultohej me ne gjatë hartimit të projektligjit të barnave. Nuk jemi thirrur fare në tryezat e organizuara nga Ministria e Shëndetësisë, ndërsa ligji e kërkon që të ishim pjesë e grupeve të punës. Projektligji është i pasakte si për pjesën kur flet për barnat dhe për pjesën që rregullon farmacitë. Duhet ripunuar si pjesa që flet për farmacinë dhe farmacistin. Ligji i konsideron farmacitë si subjekte tregtare, por farmacitë nuk janë të tilla?, është shprehur Toma.

Ndërsa deputetja e PS-së Klodiana Spahiu, ka deklaruar se nuk ndodhen në këtë komision për ta kthyer projektligjin, por për të dëgjuar sugjerimet dhe propozimet e tyre.