E fundit!

13:51 Aktualitet

Protestuesit te selitë e partive/ Vrenozi: Veprim antishqiptar, PD dhe PS nuk u prekën as në '97

Demokrati i famshëm, Ilir Vrenozi ka bërë një reagim në li...

SHBA në bisedime me Elon Musk për të mundësuar internet satelitor në Iran

22 Tetor 2022, 08:29, Tech CNA

SHBA në bisedime me Elon Musk për të mundësuar internet

Miliarderi Elon Musk

Shtëpia e Bardhë ka filluar bisedimet me miliarderin Elon Musk për të mundësuar që shërbimi satelitor i kompanisë SpaceX të ofrohet në Iran, njoftoi të premten kanali televiziv CNN.

Kanali citoi zyrtarë amerikanë në dijeni të bisedimeve, të cilët thonë se Shtëpia e Bardhë e shikon shërbimin e internetit të quajtur Starlink, si një mënyrë e mundshme për t’u lejuar iranianëve qasjen në internet, dhe anashkalimin e kufizimeve të qeverisë.

Qeveria iraniane kufizoi së tepërmi qasjen në internet pasi filluan muajin e kaluar protestat për vdekjen e 22 vjeçares Mahsa Amini, e cila ishte arrestuar nga ashtuquajtura policia e moralit.

“Po bëjmë çfarë të mundemi për të mbështetur aspiratat e popullit iranian”, i tha CNN-it një zyrtar i lartë i administratës amerikane.

“Njëkohësisht, kjo është vërtet një lëvizje iraniane, e udhëhequr nga vajzat dhe që po përhapet në aspekte të tjera të shoqërisë. Dhe ne nuk duam kurrsesi të eklipsojmë lëvizjen e tyre”, tha zyrtari.

Shtëpia e Bardhë nuk iu përgjigj menjëherë kërkesave të Zërit të Amerikës për koment.

Shërbimi Starlink, i cili përdor satelitët për të transmetuar shërbim interneti drejt tokës, i ka ofruar internetin Ukrainës që kur Rusia sulmoi ushtarakisht. Kanali CNN njoftoi javën e kaluar se kompania SpaceX i ka kërkuar Pentagonit të paguajë dhjetëra miliona dollarë në muaj për të financuar shërbimin Starlink në Ukrainë. Pasi kjo u raportua në edicionet e lajmeve, zoti Musk shkruajti në Twitter se e ka tërhequr mbrapsht kërkesën për fonde.

Nuk dihet nëse shërbimi Starlink po kërkon financimin e qeverisë së Shteteve të Bashkuara për të mundësuar aktivitetin në Iran.

Zonja Amini u arrestua më 13 shtator nga policia iraniane e moralit për “veshje të papërshtatshme të hixhabit”. Ajo vdiq tre ditë më vonë ndërsa mbahej nga policia, duke shkaktuar kështu protesta në mbarë vendin./ Voa