E fundit!

10:40 Denoncim

Zbulohet skema/ Trekëndëshi: Bashkia e Tiranës - “Kuadr.com” - Arbër Veliaj

CNA ka nisur një tjetër investigim që mund të çojë drejt z...

Tirana-Partizani, bëhet gati premio për fitore në derbi

29 Nëntor 2024, 10:11, Sport CNA

Java e 15-të në Superiore kulmon me ndeshjen vitrinë në kampionatin shqiptar, siç është derbi Tirana-Partizani.

Përballë vijnë dy ekipe me pozita të ndryshme në tabelë, por kur flitet për derbin e kryeqytetit, të gjitha statistikat bien.

Skuadrat vijnë me një diferencë prej 12 pikësh, por kanë të njëjtin objektiv, fitoren. Në derbin e dytë të këtij sezoni, Tirana vjen në vendin e shtatë në renditje dhe me numrat jo në favor të saj. 18 golat e shënuar dhe 17 të pësuar, tregojnë mungesën e ekuilibrave te bardheblutë.

Trajneri Magani ka sjellë ndryshime të rëndësishme pasi zëvendësoi në stol Bledi Shkëmbin, por e di që ka ende shumë punë për të bërë.

Te Tirana kanë bërë gati edhe një premio për lojtarët, si një mënyrë për t’i motivuar ata që të japin gjithçka në derbi. Drejtuesit e dinë se një fitore ndaj rivalëve të kryeqytetit, do të ndryshonte situatën dhe për këtë arsye janë gati ta bëjnë një sakrificë financiare.

Në anën tjetër, Partizani duket më solid në këtë përballje, të paktën në numra. Përveç se mbajnë kreun e renditjes, të kuqtë numërojnë plot 13 ndeshje pa humbje.

Disfata në javën e parë të kampionatit ndaj Vllaznisë duket shumë larg dhe te “demat” vazhdojnë të qetë drejt objektivit të madh. Trajneri i Partizanit, Veselinovic, është i vetmi që nuk e ka provuar shijen e humbjes në kampionat.

Megjithatë në një derbi, shumë pak vlen forma apo pozicioni në renditje. Tirana dhe Partizani kur janë përballë njëra tjetrës, tregojnë vlerat më të mira. Skuadrat po përgatiten për spektaklin në fushën e lojës, pasi ai në tribuna është i garantuar nga tifozët.

Tiranës iu kthyen mbështetësit për derbin dhe pritet një atmosferë elektrizuese, ashtu siç ka qenë edhe në të kaluarën. Nuk pritet të mungojnë as koreografitë nga tifozeritë, që njihen për rivalitetin mes tyre.

Ndeshja mes Tiranës dhe Partizanit, e vlefshme për javën e 15-të në Superligë, do të luhet të dielën e 1 dhjetorit, në stadiumin “Arena Kombëtare” në kryeqytet.