Strakosha: Ndaj Çekisë na duhet fitorja, është skuadër e rrezikshme

11 Nëntor 2024, 11:25, Sport CNA

Strakosha: Ndaj Çekisë na duhet fitorja, është

Portieri Thomas Strakosha doli në konferencë për mediet këtë të hënë nga grumbullimi me Kombëtaren, për ndeshjet e nëntorit në Ligën e Kombeve.

29-vjeçari u shpreh se Shqipëria ka dy finale në shtëpi dhe duhet të japë maksimumin.

Çekia? – Besoj në Çeki ndoshta kemi luajtur ndeshjen më të keqe në dy vitet e fundit. Nuk u futëm në fushë siç duhet. Pësuam gol në minutat e para. Nuk luajtëm mirë në 20 minutat e para, pra vetëm më mirë duhet të bëjmë se më keq jo. Duhet të përqendrohemi më shumë dhe të futemi mirë në fushë që në minutat e para. Kemi dy finale në shtëpi, kemi publikun tonë edhe mendoj që jemi të gjithë të përgatitur mirë. Kemi mungesa apo jo, do të japim maksimumin dhe do t'ia dalim.

Çfarë duhet të bëjmë ndaj Çekisë për të fituar? – Duhet të jemi të përqendruar pasi në ndeshjen e fundit nuk ishim. Ekipi është me më shumë eksperiencë. Vijmë nga një Europian i mirë. Kemi dy finale në shtëpi dhe kemi tifozët tanë. Duhet të japim maksimumin dhe me zemër, të luftojmë për çdo top.

Stadiumi “sold out”? – Për çdo futbollist është motivim kur e ke stadiumin plot. Na jep zemër për të luajtur mirë. Është diçka shumë e bukur për ne dhe çdo shqiptar.

Sulmuesi Chory i Çekisë? – Ne nuk shikojmë çdo lojtar ndryshe, luajmë si ekip dhe mbrojmë e sulmojmë bashkë. Kemi pësuar dy gola nga ai, duhet të kishim bërë më mirë. Tani duhet të japim maksimumin të gjithë bashkë. Do të jemi të përqendruar këtu, të mbrojmë dhe sulmojmë mirë.

Konkurrenca në portë? – Duhet të pyesim trajnerin për portierët. Unë bëj maksimumin për vete. Konkurrenca është e mirë për ne dhe për lojtarët, pasi ka pasur vite që nuk kishim.

Alen Sherri? – Kam komplimente dhe urime për Alen Sherrin dhe deri në fund mund të jetë titullar i Cagliari. E kam ndjekur që kur ishim bashkë te Kombëtarja U-21. E ka merituar shansin. Këshilla nuk mund të jap pasi ka nivel dhe aftësi shumë të mira. Duhet ta shijojë sa më shumë dhe të japë maksimumin.

Ndeshja më e vështirë? – Besoj ndeshja e parë është më e rrezikshme. Finalja e parë është me Çekinë. Është ndeshje që duhet marrë me shumë seriozitet dhe të shohim se si do të dalim.

Etrit Berisha? – Më mungon Etrit Berisha, pasi lojtarët më të vjetër japin gjithmonë eksperiencë. Kush nuk thirret na mungon, Etritin e njoh prej 12 vitesh dhe na mungon si lojtar dhe si njeri.

Shqipëria do të ndeshet më 16 nëntor me Republikën Çeke, teksa më 19 nëntor do të përballet me Ukrainën, të dyja takime që do të luhen në stadiumin “Air Albania”./CNA