Pesë ekipe në Champions, ja shtetet që kryesojnë

12 Shkurt 2025, 20:04, Sport CNA

Me ndryshimet e reja në formatin e Ligës së Kampioneve, dy shtete do të kenë mundësinë të përfaqësohen me pesë skuadra në këtë kompeticion prestigjioz. Deri më tani, Anglia e ka siguruar tashmë këtë privilegj, falë paraqitjeve të shkëlqyera të klubeve të saj në garat europiane. Megjithatë, lufta për vendin e dytë është e hapur dhe po bëhet gjithnjë e më e fortë mes Italisë dhe Spanjës.

Aktualisht, Italia mban vendin e dytë në renditjen e UEFA-s, me një total prej 17.562 pikësh, ndërsa Spanja ndodhet shumë pranë, me 17.464 pikë. Diferenca është minimale dhe çdo rezultat i ardhshëm në garat europiane mund të luajë një rol vendimtar.

Fitorja e Real Madridit ndaj Cityt në fazën e plej ofit i dha një shtysë të madhe Spanjës, duke e afruar atë më shumë me Italinë. Megjithatë, Seria A ka ende shanse të forta për të mbajtur pozicionin e saj, pasi Milan, Atalanta dhe Roma vazhdojnë të jenë në garë dhe mund të fitojnë pikë të vlefshme për koeficientin europian.

Në këtë betejë, Gjermania mbetet më e largët, me vetëm 14.921 pikë, dhe praktikisht nuk ka më shanse për të kapur dyshen kryesuese. Kjo do të thotë se beteja kryesore për këtë vend po zhvillohet mes Italisë dhe Spanjës.

Për të ruajtur vendin e dytë dhe për të pasur pesë skuadra në Champions, Italia duhet të sigurojë rezultate të mira në fazën e mbetur të kompeticioneve europiane. Në bazë të sistemit të pikëzimit të UEFA-s, fitorja në fazën play off të Champions -it vlen 2 pikë, ndërsa barazimi sjell 1 pikë. Kalimi në fazën e 1/16-ave të Champions Ligë sjell 1.5 pikë, ndërsa në Europa Ligë vetëm 1 pikë.

Kjo do të thotë se çdo fitore e Milanit dhe Atalantës në Champions League do të jetë vendimtare për të ruajtur avantazhin ndaj Spanjës.

Spanja ka gjithashtu shanse të mira për ta përmbysur situatën, duke pasur në garë ekipe si Real Madrid, Barcelona dhe Atletico Madrid në Champions. Nëse skuadrat spanjolle arrijnë rezultate pozitive, atëherë diferenca me Italinë mund të zhduket shpejt.

Real Madridi ka qenë gjithmonë një forcë e madhe në Champions dhe fitorja e tij ndaj Mançester Sitit ka dhënë një sinjal të fortë për ambiciet spanjolle.

Me Italinë dhe Spanjën që ndahen nga pak pikë, çdo ndeshje do të jetë e rëndësishme për të përcaktuar se cila ligë do të marrë pesë vende në Champions sezonin e ardhshëm.