E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Partizani zëvendëson Skukën me një sulmues kroat

10 Janar 2023, 08:36, Sport CNA

Xhuliano Skuka është lojtari më i përfolur në këtë merkato, sepse në fund të fundit të rralla janë rastet kur klube të Serisë A interesohen për një futbollist të Kategorisë Superiore. Leçe dhe Empoli kanë shfaqur interes, ndërsa Hellas Verona ka dhënë 750 mijë euro bashkë me 25% të kartonit për dibranin dhe klubi i kuq i ka thënë “jo” kësaj oferte.

Vetë Skuka natyrshëm nuk mund të jetë i lumtur pas kësaj lëvizjeje të drejtuesve, që këmbëngulin ta shesin për një shifër më të madhe ose në të kundërt ta mbajnë deri në fund të sezonit. Gjithsesi, negociatat për shitjen e sulmuesit do të vijojnë deri në fund të janarit dhe lojtari ua ka treguar qartë drejtuesve se ka një mundësi të madhe përpara, që ndoshta vjen vetëm një herë në karrierë.

Skuka nuk luajti asnjë minutë ndaj Luzit, teksa në klub raportojnë se ai po kalon një gjendje gripale. Gjithsesi, një veprim i tillë në një kohë kur merkatoja “zien” në lidhje me kalimin e mundshëm të tij, mund të interpretohet edhe si një sinjal për klubin se dibrani kërkon të mos i ikë nga duart një shans kaq i madh.

Partizani nga ana e vet e do Skukën në skuadër, sepse pretendon titullin. Gjithsesi, është e pamundur që të kuqtë të mos e kenë menduar një largim të mundshëm të dibranit dhe të mos e kenë piketuar një zëvendësues të mundshëm.

RADIÇ – Megjithëse drejtuesit po ngulmojnë për ta mbajtur Skukën, një “plan B” e kanë dhe ai quhet Dominik Radiç. 26-vjeçari është një sulmues i një standardi të lartë dhe me atë që ka treguar deri më tani, mund të konsiderohet një zëvendësues ideal për Skukën.

26-vjeçari në verë u transferua në Bosnjë Hercegovinë te Siroki Brijeg, por nuk ka gjetur dot minutat e duhura, duke luajtur vetëm 9 ndeshje në kampionat dhe dhuruar 1 asist, pa gjetur rrugën e rrjetës.

Ai ka kontratë deri në fund të vitit me klubin aktual, por minutat e pakta mund ta dërgojnë të kërkojë largimin dhe të provojë një eksperiencë në Shqipëri. Radiç qe lidhur edhe në verë me Partizanin, por ai firmosi në Bosnjë dhe më pas të kuqtë zgjodhën Alfred Mensah.