“Nuk kemi as shtëpi, bredhim nga hoteli në hotel”, trajneri i skuadrës që militon në Champions tregon peripecitë

11 Tetor 2022, 20:29, Sport CNA

Trajneri i Shahtjor Donjetskut, Igor Joviçeviç, ka dhënë një intervistë për gazetën spanjolle “Marca” ku ka rrëfyer peripecitë e tij dhe të skuadrës që drejton në këto muaj lufte në Ukrainë. Si kroat, për të luftërat nuk janë diçka e re, teksa ka përjetuar edhe më parë mbi supe, njëherë gjatë konfliktit në ish-Jugosllavi rreth 3 dekada më parë dhe tjetrën tani në Ukrainë, si pjesë e Shahtjor Donjetskut.

“Luftën e kam përjetuar vetë rreth 30 vjet më parë dhe tani është vërtet e trishtueshme që të jesh përsëri pjesë e një tjetër lufte. Mua më është dashur të largohem nga Kroacia për shkak të luftës, pa pasur mundësi të luaj për Dinamon e Zagrebit. Vendimi im për t’u larguar nga Zagrebi ishte i duhuri, sepse kalova te Reali, klubi më i mirë në botë. Atje kam fituar vlera që i ruaj dhe sot: respekti, përkushtimi, solidariteti, këmbëngulja dhe mosdorëzimi”, ka thënë trajneri i Shahtjorit.

Më pas Joviçeviç ka treguar se sa e vështirë është të përgatisësh një skuadër që strehohet ku të mundet dhe stërvitet ku të mundet. “Ne luajmë në Varshavë që cilësohet shtëpia jonë. Por nuk është realisht kështu. Jemi të lumtur që na kanë çelur dyert, por nuk është e njëjta gjë si të luash në Donjetsk. Ky është një handikap i madh”, ka thënë ai.

Por ndeshjet janë njëra anë e medaljes, tjetra janë përgatitjet. “Nuk mendoj se ka ndonjë klub tjetër në situatë të ngjashme me tonën. Jemi një skuadër pa shtëpi, shkojmë nga njëri hotel në tjetrin. Ishim në Donjetsk, më pas shkuam në Lviv dhe Karkiv nëpër hotele derisa u zhvendosëm në Kiev. Tani jemi zhvendosur në Poloni, në Varshavë. Ky është një handikap, por nga ana tjetër na bashkon dhe më shumë mes nesh, na bën më të fortë”, ka thënë mes të tjerave trajneri i Shahtjor Donjetskut.