E fundit!

08:41 Aktualitet

Zvarrit pafundësisht proceset gjyqësore/ Sot, seanca e radhës e Veliajt në GJKKO

Sot do të mbahet seanca e radhës në Gjykatën e Posaçme kun...

Ndodh për herë të parë! FSHF u jep mundësinë e artë shqiptarëve në SHBA

18 Prill 2023, 14:35, Sport CNA

Federata Shqiptare e Futbollit do të organizojë për herë të parë një përzgjedhje me futbollistët e rinj shqiptarë, të cilët jetojnë në Shtetet e Bashkuara të Amerikës. Përzgjedhja do të zhvillohet në datat 20 dhe 21 maj 2023 në zonën e Nju Jorkut dhe është i hapur për të gjithë lojtarët, djem e vajza, që duan të provojnë veten me fanellën kuqezi.

Departamenti i Ekipeve Kombëtare në FSHF po punon prej disa muajsh për mbledhjen e të dhënave dhe përpilimin e listave të futbollistëve dhe futbollisteve që duan të marrin pjesë në këtë përzgjedhje, që zhvillohet për herë të parë në Amerikën e Veriut, ku ka një komunitet të madh shqiptarësh. Të pranishëm në këtë aktivitet, përveç përfaqësuesve të Departamentit të Ekipeve Kombëtare dhe skautëve të FSHF-së, do të jenë edhe anëtarë të stafit të ekipeve kombëtare.

Me këtë rast u bëhet thirrje të gjithë të interesuarve që të aplikojnë për t’u bërë pjesë e kësaj eksperience pasi afati i regjistrimit do të jetë i hapur edhe për disa ditë. Përzgjedhjet janë të fokusuara te lojtarët e vitlindjeve 2005-2006-2007-2008-2009, ndërsa aplikimet janë të hapura edhe për futbollistet vajza, pa kufizime moshe.

Për të marrë pjesë në përzgjedhje, të interesuarit duhet të dërgojnë disa të dhëna nëpërmjet adresës së e-mailit: [email protected], ku të specifikojnë informacionet e mëposhtme:

– Emër mbiemër

– Datëlindje

– Pozicioni në fushë

– Ekipi ku aktivizohet

– Kontakt personal i lojtarit (numër telefoni)

– Adresa e e-mailit personale të lojtarit

– Adresa e saktë e e-mailit e klubit

– Uebi zyrtar i klubit

Aplikimet dhe të dhënat që do të vijnë me e-mail do të mblidhen dhe analizohen nga skautët e Federatës Shqiptare të Futbollit në SHBA së bashku me stafin teknik të FSHF-së e më pas lojtarët e përzgjedhur për të qenë pjesë e këtyre përzgjedhjeve do të lajmërohen nga Departamenti i Ekipeve Kombëtare për detajet e këtij organizimi.

Nisma e FSHF-së vjen si një rrjedhojë e kërkesave të komunitetit shqiptar në SHBA dhe rritjes së numrit të lojtarëve të perspektivës që jetojnë atje, djem e vajza, të cilët duan të provojnë shanset për të luajtur me ekipet kombëtare të Shqipërisë. Synimi i kësaj përzgjedhjeje është për të krijuar një ide më të qartë për elementët që duhen mbajtur në vëzhgim dhe me synimin për të afruar lojtarë të rinj në ekipet kombëtare të moshave.