Mjekët e spitalit të Kavajës: Dwamena u soll në kohë rekord, por ishte në “kodin e zi”

11 Nëntor 2023, 18:31, Sport CNA

Rafael Dwamena ka humbur sot jetën në mënyrë tragjike pasi pësoi kolaps në fushën e lojës në ndeshjen Egnatia-Partizani në Rrogozhinë. Lojtari u largua vetë në ambulancë por më pas në transportimin drejt spitalit të Kavajës, ai është ndarë nga jeta.

Mjekët e spitalit të Kavajës, kanë dalë para mediave me një prononcim rreth kësaj ngjarje, duke shpjeguar se ishte ndjekur procedura e plotë për rastin në fjalë.

“Pacienti erdhi në spitalin e Kavajës në “kodin e zi”, domethënë kishte bërë exitus (term mjekësor për vdekjen), pa parametra jetësorë, pa tension, pa frymëmarrje, pa aktivitet kardiak. Në EKG nuk kishte aktivitet.

Ka ardhur rreth orës 14:07, 14:10, 14:13. Ne u lajmëruam nga ekipi i qendrës shëndetësore të Rrogozhinës rreth orës 2 pa pak dhe i kishim marrë masat se e dinim që do të vinte rasti. E ngritëm të gjithë personelin në këmbë. U bë reanimimi kardio-pulmonar dhe nuk u arrit. Nuk kishte më shpresa, ishte i pashpresë.

A i kishin pajisjet e duhura? Transportimi është bërë. Ambulanca e Rrogozhinës i ka të gjitha, sepse ka ardhur me ambulancën e Rrogozhinës në spitalin e Kavajës. Ne këtu i kemi bërë të gjitha me ekipin mjekësor, reanimimin, frymëmarrjen, masazhin kardiak sipas protokollit. Respektuam protokollin mjekësor që bëhet në këtë rast.

Por shkakun nuk e dimë, ka ndodhur në fushë sipas të dhënave dhe ka bërë gjendje të fikti atje.

Fjalën e fundit e thotë mjekësia ligjore, çohet sipas procedurave ligjore ne spitalin rajonal të Durrësit.

Për mendimin tim i është dhënë ndihma e duhur që në vendin e ngjarjes të ndodhur, se edhe minutazhi ka qenë shumë i shpejtë, në fushë ka qenë 2 pa pesë, ka ardhur në 2 e 10, në kohë rekord. Edhe sikur të shkonte ekipi jonë do të ishte shumë më vonë, ka ardhur në kohë rekord, më shpejt nuk mundet. Por kur ka ardhur, ka ardhur pa parametra jetësorë.

Shkaku? Nuk na kanë dhënë se edhe ne informacionet e sakta nuk i dimë. Ne flasim për atë që ka ndodhur në spitalin e Kavajës, për pjesën tjetër është dikush tjetër. Nuk ia arritëm! Se na erdhi keq edhe ne, se kemi kalamaj e të gjitha, por këto janë…”, tha Riza Lala, mjeku i spitalit të Kavajës i cili u paraqit para mediave për të dhënë shpjegimet e kësaj ngjarje tragjike.