Ilir Daja kërkon kujdes nga ekipi: Nuk përgatitem kurrë për penallti

30 Korrik 2025, 20:56, Sport CNA

Ilir Daja kërkon kujdes nga ekipi: Nuk përgatitem kurrë për

Dinamo është gati për sfidën e kthimit ndaj Escaldes në turin e dytë të Conrference League. Kryeqytetasit do të luajnë në “Elbasan Arena” me avantazhin 2-1 të ndeshjes së parë në Andorra.

Në prag të kësaj përballje, trajneri Ilir Daja deklaroi se nuk ka ndeshje të lehta më Europë, dukë kërkuar përqendrim maksimal nga ekipi i tij.

"Po themi që jemi mirë, sepse rikthehen Dita dhe Itodo që nuk kanë qenë në ndeshjen e parë. Për të sqaruar opinionin dhe tifozët e Dinamos, të dy nuk kanë qenë në gjendje për ndeshjen e parë. Kemi mungesën e Rustem Hoxhës, një tjetër kapiten i ekipit. Pati një dëmtim në seancën e pardjeshme. Kemi në diskutim edhe një tjetër lojtar, për arsye shëndetësore, por që do shohim deri nesër. Mendoj që do ishte shumë mirë të kishim gjithë kontingjentin në dispozicion, por që jemi mirë.

Nesër është ndeshja e 56-të në Europë si trajner. Asnjëherë nuk ka pasur ndeshje të lehta, sado në letër të jetë i nivelit të lartë ose jo. Kemi bërë një hap të mirë në ndeshjen e parë, jo vetëm në rezultat, por që kemi bërë një pjesë të dytë goxha të mirë. Dihet që këto ndeshje nuk përfundojnë me ndeshjen e parë, por duhet akoma më shumë të jemi të fokusuar nesër, pavarësisht rezultatit që kemi marrë në Andorra.", tha trajneri.

Daja tha se nuk e ka përgatitur ekipin për penalltitë, diçka që sipas tij nuk e ka bërë as më parë. Gjithashtu ai zbuloi edhe merakun e tij për këtë përballje.

“Asnjëherë nuk jam përgatitur për penalltitë, të them të drejtën, edhe kur kam drejtuar ekipe të tjera. Nuk dua ta çoj psikologjikisht ekipin drejt një rezultati që shkon drejt penalltive. Arsyeja e dytë është që është tjetër të gjuash penallti në stërvitje dhe tjetër në ndeshje. Me ditët që kemi pasur në dispozicion kemi marrë masat për një ndeshje të vështirë, kemi një ekip simpatik përballë, që ka manovër të konsoliduar, sidomos në fazën e sulmit. E vlerësojmë kundërshtarin, por në fund fare do vlerësojmë më shumë edhe veten tonë.

Si në çdo ndeshje, meraku më i madh është si do jetë ekipi nesër. Në periudhë vere gjendja e ekipeve është e luhatshme, për shkak të mungesës së ritmit të lojës. Shpresojmë që me kontingjentin që kemi në dispozicion të japim më të mirën e mundshme, jo vetëm për të prezantuar Dinamon në Europë pas shumë vitesh mungesë, por edhe për të përfaqësuar nivelin e futbollit shqiptar në arenën europiane.

Edhe kur kam arritur në grupe në drejtimin e Skënderbeut dhe Ballkanit, nuk e kam menduar në turin e dytë kualifikues shkuarjen në grupe. I kemi marrë gjërat hap pas hapi. Këtë gjë do bëjmë edhe me Dinamon, pastaj do shohim deri ku mund të arrijmë”, deklaroi Daja.