web counter
LEXO PA REKLAMA!

SHKARKO APP

App Store
Google Play

Humbja në kampionat, klubi i Kategorisë së Parë shkarkon trajnerin

23 Shtator 2022, 11:13, Sport CNA
Humbja në kampionat, klubi i Kategorisë së Parë shkarkon
Klevis Dalipi

Klevis Dalipi nuk do të jetë më trajner i Apolonisë. Nuk ka zgjatur as tre muaj aventura e 46-vjeçarit në krye të pankinës fierake. Erdhi në fund të qershorit dhe largohet pa u mbyllur ende shtatori.

Klubi e ka shkarkuar dhe shkak është bërë humbja me përmbysje përballë Besës, që përkonte vetëm me javën e tretë të Kategorisë së Parë.

Presidencës nuk i ka pëlqyer aspak si shkoi ndeshja në Peqin (që u kthye vetëm 9 minutat e fundit të lojës, ndonëse ishin në avantazh deri në të 83-ën), ndaj ka marrë këtë vendim drastik dhe në mënyrë të menjëhershme.

Edhe pse elbasanasi mori përsipër që të drejtonte një ekip ku dominonin të rinjtë dhe pa përvojën e duhur, drejtuesit prisnin tjetër gjë. Në të parën humbje, kanë bërë këtë zgjidhje: ta largojnë nga stoli.

Stërvitja e së mërkurës dhe të enjtes nuk është drejtuar prej Klevis Dalipit, por nga drejtori sportiv Maringlen Kule dhe përgatitësi atletik Dario Dian, të cilët kanë asistuar vazhdimisht në përgatitjet e Apolonisë.

Nëse mungesa e teknikut nuk bëri fort përshtypje në ditën e parë, në të dytën u kuptua se diçka kishte ndodhur.

Para se të merrte “dhenë” lajmi, gazeta u interesua se çfarë po ndodhte te zyrtarë të klubit të pranishëm gjatë seancës së djeshme. E megjithatë, askush nuk dha detaje dhe e vetmja gjë që thanë ishte: “Mungon”.

Lajmin e ka bërë të ditur vetë tekniku, nëpërmjet një postimi në rrjetet sociale. Ai ka falënderuar futbollistët me të cilët kishte nisur këtë sezon:

“Projekt i papërfunduar! Një falenderim për impenjimin dhe seriozitetin e treguar nga ju djema. Suksese… Jeni më të mirët”.





Lajmet e fundit nga