web counter
LEXO PA REKLAMA!

SHKARKO APP

App Store
Google Play

Teo Hernandez dhe Tonali trembin Milanin, Pioli: As Çelsi e as Juventusi nuk na frikësojnë!

23 Shtator 2022, 10:55, Sport CNA

Humbja me Napolin ka turbulluar disi ujërat edhe te Milani, ndonëse kuqezinjtë bënë një ndeshje fantastike, edhe pse në fund ishin të kaltrit ata që bënë festë në “San Siro”.

Gjithsesi, më shumë sesa disfata me jugorët, e cila mund të pranohet duke marrë parasysh se flitet për një konkurrente direkte për titull, ato që ngrenë alarmin në Milano janë dëmtimet.

Edhe pse lajmet e mira deri pak orë më parë thonin se sulmuesit Ante Rebiç dhe Divok Origi janë në fazë riaftësimi dhe do të jenë në dispozicion për ndeshjen e ardhshme me Empolin, janë problemet e Teo Hernandezit dhe Sandro Tonalit, që prishin shumë plane për “Djallin”.

Liderët e mbrojtjes dhe mesfushës kuqezi kanë dalë që të dy me probleme nga sfida me Napolin, por stafi mjekësor i Milanit nuk arrin që të japë një kohë të saktë lidhur me rikthimet e tyre në fushë.

Gjithsesi, ai që nuk kërkon që t’i ushqejë frikë skuadrës së tij është Stefano Pioli. Trajneri i Milanit dje u vlerësua me çmimin “Nereo Roko” në Firence, ku përfitoi për të folur edhe për disa nga ndjesitë e këtij sezoni që sapo ka nisur.

“Po provojmë që të përmirësojmë ende nivelin tonë dhe besoj se po bëjmë gjëra fantastike, edhe pse vështirësitë në kampionat janë evidente.

Përveç dëmtimeve do të gjej edhe lojtarë që mund të kenë luajtur vetëm 48 orë përpara 90 minutave të plota me kombëtaret e tyre dhe kjo është tepër delikate.

Gjithsesi, është e kotë që të qahemi, por të vazhdojmë të punojmë që të gjejmë vazhdimësi. Çelsi dhe Juvja, udhëkryqet e sezonit? Me Çelsin mund t’i luajmë ballë për ballë të dyja ndeshjet radhazi që kemi, pasi jemi në të njëjtin nivel.

Nuk kemi nevojë që në sfidat me Çelsin dhe atë me Juven të kuptoj se cilët jemi! E përsëris, jemi Milani, një skuadër shumë kompetitive që do të luftojë në çdo aspekt."





Lajmet e fundit nga