web counter
LEXO PA REKLAMA!

SHKARKO APP

App Store
Google Play

Fitorja e gjashtë radhazi, Roma me ecuri fenomenale

9 Mars 2025, 20:35, Sport CNA

Fitorja e gjashtë radhazi, Roma me ecuri fenomenale

Roma vazhdon me formën e jashtëzakonshme në Serinë A. Verdhekuqt regjistruan fitoren e radhës, pasi mposhtën në transfertë Empolin, me rezultatin 1-0.

Për kryeqytetasit kjo ishte fitorja e gjashtë radhazi dhe mbajnë gjallë shpresat për një vend në garat europiane të sezonit të ardhshëm.

Skuadra e drejtuar nga Claudio Ranieri e nisi ndeshjen në sulm dhe e gjeti avantazhin shumë shpejt. Pas vetëm 1 minute lojë, Sule zhbllokoi rezultatin, pas një goditje të bukur me këmbën e majtë nga jashtë zonës së rreptësisë, duke e dërguar topin në cepin e poshtëm të portës së Empolit. Një gol i shpejtë që tronditi vendasit dhe i dha Romës një fillim të përkryer.

Pasi kaluan në avantazh, verdhekuqtë u përballën me një periudhë të shkurtër presioni nga Empoli, por arritën ta përballonin pa shumë vështirësi. Për më tepër, Roma ishte shumë pranë dyfishimit të epërsisë por Pelegrini u ndal nga shtylla.

I pafat ishte edhe Shomurodov, i cili pas një asisti të marrë nga Pelegrini u ndal nga tranversa. Shtylla u kthye në makthin e miqve, pasi ndali edhe mesfushorin Kone para fundit të pjesës së parë.

Fraksioni i dytë nisi me të njëtin ritëm, me Romën që kontrolloi lojën dhe Empolin që kishte vështirësi të krijonte ndonjë mundësi të rrezikshme.

Silvestri ndali një gjuajtje të shkëlqyer të Pelegrinit në minutën e 61-të, duke mohuar golin e dytë të Romës.

Skuadra kryeqytetase arriti të ruante avantazhin minimal dhe të siguronte tri pikë të arta në garën për një vend në kompeticionet europiane. Me këtë fitore, verdhekuqtë ngjiten vetëm katër pikë pas vendit të gjashtë, të cilin momentalisht e mban Bolonja. Fitorja e gjashtë radhazi dëshmon formën e shkëlqyer të ekipit të Ranierit, i cili po vazhdon të ndërtojë një ekip të fortë dhe konkurrues në Serinë A.





Lajmet e fundit nga