Uzuni tregon golin që i ndryshoi jetën: Në stadium më ndoqën...

8 Mars 2025, 19:06, Sport CNA

Uzuni tregon golin që i ndryshoi jetën: Në stadium më

Karriera e Myrto Uzunit nuk ka qenë aspak e lehtë. Një sulmues që ka sfiduar parashikimet dhe ka ndërtuar një karrierë të jashtëzakonshme, duke u bërë një nga futbollistët më të spikatur shqiptarë të viteve të fundit. Ai ka pushtuar me gola Hungarinë, Spanjën dhe tashmë ka nisur një sfidë të re në Amerikë, por për të, goli më i veçantë mbetet ai i shënuar me fanellën e Laçit, një moment që ndryshoi rrjedhën e jetës së tij.

Më 19 korrik të vitit 2018, skuadra kurbinase përballej me qipriotët e Anorthosis në kualifikueset e Europa League. Laçi fitoi 1-0 dhe golin e vetëm e shënoi Uzuni në minutën e 88-të.

Në stadium ishin vëzhgues nga Lokomotiva e Zagrebit, të cilët e kishin ardhur për të ndjekur talentin shqiptar.

Ky ishte momenti që e ndryshoi jetën e Uzunit. Një gol që nuk e fitoi vetëm një ndeshje, por edhe një biletë për në një kampionat më të fortë.

“Ne shkuam në "Play off", nuk arritëm dot deri te grupet, por për herë të parë morëm pjesë në kupat e Europës me Laçin. Në stadium ishin vëzhgues nga Lokomotiva e Zagrebit për të më ndjekur. Isha në një klub të vogël, por që pati sukses. Unë luaja si lojtar i krahut të majtë. Ajo ndeshje pati 90 për qind zotërim topi prej tyre, dhe vetëm 10 për qind nga ana jonë. Ne thuajse nuk e prekëm fare topin. Vëzhguesit nga Zagrebi më thanë pas ndeshjes se nëse do të veçonin një lojtar, ky do të isha unë. Në minutat e fundit erdhi një kros dhe unë shënova me kokë. Ne fituam 1-0. Ai ishte momenti i jetës sime. Ai moment ndryshoi gjithçka”, tha Uzuni.

Pak javë më vonë, ai firmosi për Lokomotivën e Zagrebit, duke nisur rrugëtimin e tij në futbollin europian.

Në Kroaci, Uzuni nuk u desh shumë kohë për të treguar aftësitë e tij. Ai u shndërrua shpejt në një nga lojtarët më të rëndësishëm të Lokomotivës së Zagrebit, duke u bërë një titullar i padiskutueshëm dhe duke shënuar gola të rëndësishëm. Aftësia e tij për të luajtur si sulmues anësor apo si qendërsulmues, shpejtësia dhe ndjesia e golit e bënë atë një nga lojtarët më të spikatur të skuadrës.

Performancat e tij të shkëlqyera nuk kaluan pa u vënë re dhe shumë klube nisën të shfaqnin interes për të.