web counter
LEXO PA REKLAMA!

SHKARKO APP

App Store
Google Play

E fundit!

x

Dinamo fiton Kupën e Shqipërisë, mposht Egnatian pas 5 golave

13 Maj 2026, 21:10, Sport CNA

Dinamo ka fituar Kupën e Shqipërisë, për të dytin vit radhazi. Kryeqytetasit triumfuan 3-2 ndaj Egnatias në finalen e zhvilluar në stadiumin “Air Albania”.

Sukses i rëndësishëm për të besuarit e Ilir Dajës, që dërgojnë në 15 numrin e trofeve të Kupës së Shqipërisë në histori.

Ndeshja nisi e zjarrtë që në fillim, ku rrogozhinasit mbetën me 10 lojtarë. Bakayoko u ndëshkua me karton të kuq në minutën e 6-të, pas një ndërhyrje të ashpër ndaj portierit Aldo Teqja, i cili u largua me barelë nga fusha dhe u transportua në spital.

Në superioritet numerik, skuadra kryeqytetase u hodh në sulm, në kërkim të golit të avantazhit, që e gjeti në minutën e 23-të.

Malomo shfrytëzoi një asist të marrë nga Nani në zonë dhe e dërgoi topin në rrjetë, duke zhbllokuar takimin.

Vetëm gjashtë minuta më vonë, Dejvi Bregu dyfishoi shifrat, me një supergol të shënuar nga jashtë zone.

Pjesa e parë u mbyll me këtë rezultat, ndërsa e dyta nisi me karton të kuq për Dinamon. Malomo u ndëshkua me të dytin e verdhë në minutën e 51-të, duke barazuar numrin e lojtarëve në fushë.

Pas kësaj, Egnatia u hodh në sulm, por la hapësira në prapavijë, të cilat në minutën e 73-të u shfrytëzuan nga Lorenco Vila. Megjithatë, goli i tij u anulua për pozicion jashtë loje.

Në minutën e 81-të, Egnatia gjeti golin me Buricc, i cili ngushtoi shifrat në 2-1.

Megjithatë, edhe këtë herë reagimi i Dinamos ishte i menjëhershëm. Pas një kundërsulmi të shpejtë, Mustapha realizoi të tretin për skuadrën e Dajës, në minutën e 84-t.

Në shtesë, Egnatia ngushtoi shifrat në 3-2 me golin me kokë nga Adjesa, por pa arritur të barazojë shifrat.

Në fund, nuk mungoi as tensioni, ku si pasojë e përplasjes së stafeve, trajneri Ilir Daja u ndëshkua me të kuq.

Tashmë si Dinamo dhe Egnatia do e përqendrojnë vëmendjen te “Final Four”, pasi kanë siguruar kualifikimin.  





Lajmet e fundit nga