E fundit!

12:16 Aktualitet

SPAK kërkon 98 vite burg për Durim Bamin, Aldo Avdylin dhe 5 të tjerë

Prokuroria e Posaçme ka dhënë pretencën për disa nga të pa...

Champions League/ Sot vendosen çerekfinalistet, vëmendja te Liverpool-PSG

11 Mars 2025, 08:17, Sport CNA

Champions League/ Sot vendosen çerekfinalistet, vëmendja te

Mbrëmjen e kësaj të marte, do të përcaktohen katër skuadrat e para që kualifikohen në çerekfinalen e Ligës së Kampioneve. Padyshim vëmendja më e madhe do të jetë të supersfida mes Liverpool dhe PSG-së, e cila do të luhet në Angli.

Në takimin e parë në Francë, të kuqtë e Arne Slot triumfuan minimalisht, falë një goli të shënuar nga Eliot në fund. Megjithatë duhet thënë se PSG-ja ishte dominuese gjatë gjithë kohës, ku u ndal në disa raste nga portieri Alison. Nëse i hedhim një sy statistikave, shohim se skuadrat franceze nuk kanë fituar asnjë nga 15 ndeshjet e tyre të fundit në Angli dhe skuadra e Luis Enrique, duhet të thyeje mallkimin. Te PSG-ja duan përmbysjen e madhe, diçka që e kanë bërë edhe në të kaluarën. Në “Anfield” pritet një ndeshje shumë e luftuar, ku spektakli është i garantuar.

Përballje interesante është edhe ajo mes dy ekipeve gjermane. Leverkusen pret në shtëpi Bayern Munich, pas humbjes 3-0 në takimin e parë. Përmbysja duket një mision thuajse i pamundur, por të besuarit e Xabi Alonsos nuk e kanë thënë ende fjalën e fundit. Vetë trajnerit, në konferencën për shtyp, deklaroi se ekipi dhe ai vetë besojnë në një mrekulli, siç bënë sezonin e kaluar, kur fituan titullin kampion pa asnjë humbje në kampionat.

Bayern vjen i qetë në këtë përballje, pas fitores së pastër në takimin e parë në shtëpi. Edhe këtë herë, pritet një përballje shumë e luftuar me aspirinat, që do të kërkojnë të zhbllokojnë ndeshjen sa më shpejt të jetë e mundur. Paralelisht do të luhet sfida mes Interit dhe holandezëve të Feyenoord. Italianët janë me një këmbë në çerekfinale, pas fitores 2-0 në transfertë. Skuadra e Inzaghit po kalon një moment të artë dhe kualifikimi duket thjesht formalitet. Në krahun tjetër, te Fejnordi kanë kujtime të bukura nga vizita e fundit në Itali, ku barazuan 1-1 me Milanin, për t’i eliminuar kuqezinjtë nga Liga e Kampioneve.

Holandezët do të kërkojnë një tjetër mrekulli, ndonëse e dinë se do të jetë shumë e vështirë. Këto takime do të luhen në orën 21:00, ndërsa me herët, do të zbresin në fushë Barcelona dhe Benfica.

Katalanasit fituan minimalisht në ndeshjen e parë në Portugali dhe duken shumë afër kualifikimit. Megjithatë te Benfica nuk e kanë thënë ende fjalën e fundit dhe synojnë përmbysjen.