Banorët e fshatit Qinam protestojnë kundër projektit të paneleve diellore që prek kullotat e fshatit

29 Nëntor 2025, 11:07, Sociale CNA

Banorët e fshatit Qinam protestojnë kundër projektit të

Në fshatin Qinam të Kolonjës është ngritur sot një reagim i fortë nga banorët, të cilët kanë dalë në protestë pas vendimit të Këshillit Bashkiak për t’i dhënë me qira një kompanie private rreth 3.5 hektarë tokë kullotë për ndërtimin e një parku me panele diellore. Sipas banorëve, bëhet fjalë për një nga hapësirat kryesore që prej vitesh përdoret nga komuniteti për mbajtjen e bagëtive, ndërsa vendimi është marrë pa kryer asnjë konsultim publik me ta. Kjo zonë shërben si pikë qendrore kullotash ku, çdo vit, mbështeten mijëra krerë bagëti të imëta dhe gjedhë, të cilat përbëjnë burimin kryesor të të ardhurave për familjet e fshatit. Banorët thonë se zëvendësimi i kësaj hapësire me panele diellore rrezikon të shkatërrojë aktivitetin blegtoral, duke u hequr atyre mundësinë për të ushqyer bagëtinë gjatë gjithë vitit.

Banorët e fshatit Qinam protestojnë kundër projektit të

"Çështjen e kullotave, ato arat atje i kemi të ndara, duan të na i marrin, t'i bëjnë panele diellore. Kemi dhe një vend tjetër që mban tërë fshatin me kullotë dhe atë duan të na e marrin. Po u bënë panele këtu janë 3000-4000 kokë bagëti, 600 krerë lopë, ku do vejë kjo kullotë? Ne si fshat blejmë Gramozin të tërë me kullotë, mirë beharin e zgjidhim po dimrin ku të vemë. Duhet të merren masa që të mos na merren këto kullota se na prish punë shumë."

"Jam fermer, kam 20 krerë lopë, tani kjo bashkia që do të bëjë këto panele këtu e di që edhe këto 10 familje që janë fermerë do të ikin. Sado që unë, edhe pse me 20 krerë lopë, mos të më dalë emri për të përfituar subvencion, vetëm kjo qeveri i bën këto. Unë sot e kësaj ditë s'kam marrë subvencion vetëm ngaqë jam i djathtë, por unë nuk ndryshoj krah, i djathtë do të mbetem."

Sipas tyre, vendimi për ndërtimin e parkut fotovoltaik prek jo vetëm fermat e mëdha, por edhe familjet e vogla që mbështeten në blegtori për mbijetesë. Banorët shprehen se nëse projekti zbatohet, shumë prej tyre do të detyrohen të shesin bagëtinë ose të largohen nga fshati, pasi humbja e kullotave do ta bëjë të pamundur vazhdimin e punës së tyre.

"Ky problem për ne është shumë i madh, pasi ne kemi bagëti shumë, nuk kemi ku t'i çojmë. Unë kam 20 krerë lopë, i mbaj këtu, nuk i çoj lart se i kam për qumësht. Tani po u bënë ato ku do të shkojmë ne, t'i shesim të gjitha, të shitemi edhe vetë se s'kemi ku të shkojmë".

"Ka diskutuar bashkia edhe të tjerë, por ne jemi si fshat i mbaruar, ne t'i marrim e t'i shesim, edhe fëmijët t'i nisim jashtë, edhe vetë të ikim. Unë 20 lopë kam, bujqësia dhe blegtoria të lidhura janë me njëra-tjetrën. Vëllezërit e mi kanë një kope. Po na i morën ne s'kemi ku të shkojmë, vetëm t'i shesim e t'i themi Ramës udhë e mbarë për këtë fshat."

Banorët e fshatit Qinam protestojnë kundër projektit të

Banorët shtojnë se problemi nuk kufizohet vetëm në këtë parcelë, pasi ka edhe zona të tjera të fshatit që sipas tyre po synohen për përdorime të ngjashme, duke rritur pasigurinë për të ardhmen. Komuniteti kërkon pezullim të menjëhershëm të projektit dhe rishikim të plotë të vendimit, duke theksuar se kullotat janë jetike për ekonominë dhe mbijetesën e Qinamit./CNA