E fundit!

11:06 Aktualitet

Veliaj vijon skemat/ Përdor avokatin e pandehur për të shtyrë seancën

Kryebashkiaku i arrestuar i Tiranës, Erion Veliaj mbi ...

Zgjedhjet në FRPD dhe lobingjet e “call center"-ave që po deformojnë garën

1 Shtator 2022, 19:00, Politikë REDAKSIONALE

Zgjedhjet në FRPD dhe lobingjet e “call center"-ave që po

Foto ilustruese

Forumi Rinor i PD-së është përfshirë në procedurat e zgjedhjes së kryetarit, një proces që numëron plot 6 kandidatë, në një garë që formalisht mund të konsiderohet ndër më demokratiket, për nga numri i pjesëmarrësve.

Por duket se rregullat me ose pa dashje po shkelen dhe kjo mund të deformojë një proces. Fillimisht pati akuza për lobingje në favor të një kandidati, edhe pse lobimi është diçka e pranueshme dhe aspak shkelje standardesh demokratike. Flamurin e sulmit e mori shqiptaro-amerikania Evi Kokalari, që shigjetoi Belind Këlliçin, që sipas saj po tentonte të zgjidhte një nga të preferuarit e tij.

Kuptohet pas Kokalarit qëndron një grupim, i afruar së fundmi me PD-në, duke shfrytëzuar çdo situatë të krijuar si rezultat i përplasjeve të brendshme në këtë parti.

Evi Kokalari

Akuza nga ata që morën përsipër “sulmin” nuk synonte vendosjen e ndonjë rregulli, që asnjë grupim brenda apo jashtë FRPD-së të qëndronte neutral dhe të 6 kandidatët të garonin me platformat e tyre, por një tentativë për të stepur ata që u vendosën në epiqendër të sulmit.

Dhe kjo u pasua me një angazhim të ethshëm, pa norma e pa moral, në favor të një tjetër kandidati, a thua se kjo mënyrë lobimi është më e ndershme se ajo për të cilën u vendos nën sulm politik Këlliçi.

Belind Këlliçi

Dhe si per të mos u mjaftuar me këtë presionin e ngjashëm me atë shprehjen “mos bëni siç bëj unë, por bëni siç them unë”, garës së FRPD-së çuditërisht po i ngatërrohen nëpër këmbë lobingjet e “call center”-ave. Dhe që të mos keqkuptohemi, jo të atyre që kanë të punësuar me qindra e qindra të rinj anembanë vendit, por “call center” që dikur i shërbenin Lulzim Bashës dhe villnin vrer ndaj demokratëve që përbënin shtyllën kurrizore të PD. Dhe hahengut të krijuar nga “call center” i është bashkuar edhe një korr, që shfaqen si neutralë, si të painteresuar, por që çuditërisht po sulmojnë ata kandidatë që mendojnë se Lulzim Basha nuk mund të drejtonte më PD-në.

Pa dashur të hyjmë në emra konkretë se cili grupim mbështet njërin apo tjetrin kandidat, thelbi është se dikush ose disa, pavarësisht pozicioneve të tyre, po përpiqen të minojnë garën brenda FRPD-së.

Po minojnë rregullat jo përmes lobingjeve të ndershme, por përmes deformimit. Dhe këtë nuk e bëjnë në emër të asnjë parimi, as të ndonjë dashamirësie kundrejt atyre që mbështesin, por për të treguar se ata kanë influenca.

Po kujt duan t'i tregojnë se kanë influencë, kur vetë nuk janë përfshirë në asnjë garë, në asnjë proces votimi brenda PD-së, kur kanë pasur shansin për të treguar se me qëndrimet e tyre mbështeten nga anëtarët e kësaj partie?

Natyrisht influencën nuk duan t'ia tregojnë kandidatëve në garën për FRPD-në, por ekipit drejtues të kësaj partie, ndoshta edhe Sali Berishës, i cili duket se po i qëndron deri në fund parimit për të mos ndërhyrë në një proces, të cilin ia ka besuar votës.

Sali Berisha

Por sa mund të respektohet ky parim kur nga individë apo grupime të ndryshme, duke shfrytëzuar edhe situatat që kjo parti ka kaluar përgjatë vitit të fundit, po deformohet gara përmes ndërhyrjeve, sulmeve, përdorimit të aseteve të padeklaruara apo duke viktimizuar kandidatin që ato duan të shpallet fitues?

Me shumë gjasa rreziku që i vjen parimit të votës është shumë më i madh pikërisht nga kjo kategori, e cila as më shumë e as më pak po aplikon pikërisht atë fenomenin e shëmtuar të deformimit jo thjesht të votës, por të gjithë procesit. Dhe këtë po e bëjnë duke u shfaqur si viktima, si personazhe që iu dhimbset shumë “vota” dhe barazia mes kandidatëve, por që në fakt janë të gatshëm të mos pranojnë asnjë rezultat dhe të hedhin baltë mbi cilindo prej emrave fitues, nëse ai nuk është i preferuari i tyre.

Dhe ky është momenti kur dikush duhet të ndërhyjë, jo për të favorizuar një emër kundrejt tjetrit, por për t'u thënë ndal këtyre që s'kanë parime, s'kanë moral, s'njohin as votën, dhe tentojnë të fusin në kaos një proces që nisi si model dhe mund të mbyllet me turp./CNA.al