web counter
LEXO PA REKLAMA!

SHKARKO APP

App Store
Google Play

Raporti i ODIHR-it nuk mund të hollohet me ujë siç bëri sot zonja Kos

21 Nëntor 2025, 16:08, Politikë CNA

Raporti i ODIHR-it nuk mund të hollohet me ujë siç bëri

Deputeti i PD-së, Oerd Bylykbashi, ka komentuar deklaratat e Komisioneres për Zgjerimin, Marta Kos, e cila u shpreh se zgjedhjet e 11 majit ishin të lira dhe të ndershme.

Sipas Bylykbashit, Kos nuk ka kompetencë të zgjerojë dhe as të tresë Raportin Përfundimtar të ODIHR-it.

Ai theksoi se komisionerja për Zgjerimin duhet patjetër ta tërheqë menjëherë deklaratën dhe mjafton të citojë raportin e OSBE-ODIHR.

“Raporti i ODIHR-it nuk mund të hollohet me ujë siç bëri sot zonja Kos. Komisionerja e Zgjerimit zj. Marta Kos deklaroi se zgjedhjet e 11 majit 2025 'kanë qenë të lira e të ndershme'. Çfarë është më e rëndë është që ajo e dha si konkluzion të saj në emër të BE-së, jo si citim të ODIHR-it.

ODIHR në raportin përfundimtar ka deklaruar që në fjalinë e parë që 'konkurrentët nuk patën fushë loje të barabartë'.

Brenda paragrafit të parë, ODIHR thotë se 'Partia në pushtet përfitoi nga përdorimi gjerësisht i burimeve administrative gjatë fushatës, duke krijuar avantazh të padrejtë për shkak të qenies në pushtet'.

Në asnjë rresht të raportit final, për asnjë moment, ODIHR nuk thotë që zgjedhjet ishin të lira e të ndershme, siç thotë zj. Kos.

Ajo që ODIHR tha prerazi është se është prishur ndarja mes shtetit dhe partisë në pushtet. Kjo është shkelje e një parimi themelor, që sjell një fushë loje të pabarabartë, pra zgjedhje janë të pandershme.

'Zgjedhësit patën presion', thotë ODIHR. Pra, zgjedhjet nuk ishin as të lira.

Kreu i delegacionit të Parlamentit Europian në kuadër të Misionit Ndërkombëtar të Vëzhgimit të Zgjedhjeve, eurodeputeti Gahler, nënvizoi qartë se krimi i organizuar pengoi rotacionin politik.

Sa kohë nuk ka një raport tjetër dhe Komisioni Europian nuk kishte misionin e vet të vëzhgimit, pyetja ime është: E ka lexuar raportin e ODIHR dhe nëse po, ku e lexoi Komisionerja e Zgjerimit, zj. Kos shprehjen se 'zgjedhjet ishin të lira e të ndershme'?!

Zj. Kos, si Komisionere Zgjerimi nuk ka kompetencë të zgjerojë dhe as të tresë raportin përfundimtar të ODIHR-it. Duhet patjetër ta tërheqë menjëherë atë deklaratë. Herë tjetër mjafton vetëm të citojë raportin e ODIHR-it”, tha Bylykbashi./ CNA





Lajmet e fundit nga