E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

Rama i bie nga Haga të çmontojë SPAK-un

21 Dhjetor 2024, 11:46, Politikë CNA

Kryeministri Edi Rama

Kryeministri Edi Rama foli dje në Prishtinë për Gjykatën Speciale, gjatë fjalës në mbledhjen e përbashkët të dy Kuvendeve, të Shqipërisë dhe Kosovës.

Rama sulmoi Gjykatën Speciale që selinë e ka në Hagë dhe kërkoi që të ngrihet një mision verifikimi dhe të bëhet një rezolutë kundër saj.

Gjithashtu, kreu i qeverisë propozoi që rezoluta të depozitohet edhe në Kuvendin e Shqipërisë, ndërsa u zotua se Partia Socialiste do ta miratojë.

Gjykata Speciale e Kosovës

“Unë nuk rri dot po ashtu, pa ua thënë këtu vëllazërisht çudinë time për faktin që në këtë sallë nuk është ndërmarrë asnjëherë një nisëm për t’ju kërkuar përmes një rezolute të mbështetur nga të gjitha forcat politike, të paktën nga partitë shqiptare, të gjitha vendeve financuese të asaj gjykate shqetësimin e madh mbi standardet e atij procesi dhe për të kërkuar ngritjen e një misioni verifikimi lidhur me këtë shqetësim.

Gjykata është e pavarur, por standardet nuk janë të varura nga gjykatësit. Ndoshta ky shqetësim gjerësisht i përhapur mund të mos qëndrojë, por nëse qëndron atëherë kjo është një gjëmë e madhe. Jo për ata 4 njerëz të thjeshtë, as vetëm për Republikën e Kosovës por për vetë integritetin e drejtësisë ndërkombëtare, së cilës kjo Republikë përmes përfaqësuesve të saj në këtë sallë ja dha në mirëbesim gjykimin e historisë që lindi Republikën dhe prandaj nuk mund të lihet, sipas meje, në heshtjen shurdhuese që ushqehet prej gjithfarë motivesh nga më fisnikët, deri tek më politikët që ajo gjëmë, nëse është gjëmë, ta bëjë dëmin e vet deri në fund.

Kryeministri Edi Rama

Gjithsesi unë dua ta dini të gjithë ju këtu dhe ata që na dëgjojnë, që nëse Kuvendi i Kosovës kurdo qoftë do e merrte nismën për t’iu drejtuar të gjitha shteteve sponsorizuese të Gjykatës Speciale dhe për të ndarë me to dyshimin e arsyeshëm për cënimin e standardeve demokratike në procesin ligjor kundër Hashim Thaçit, Jakup Krasniqit, Kadri Veselit dhe Rexhep Selimit dhe nëse do të na kërkohej që një nismë e tillë t’i bashkohej dhe Kuvendi i Shqipërisë, unë nuk flas dot për të tjerët, por veç për forcën time politike. Partia Socialiste do ta angazhojë pa asnjë ngurrim që të njëjtën rezolutë të votuar nga Kuvendi i Kosovës, ta depozitonte në Kuvendin e Shqipërisë”, deklaroi kryeministi.

Pra, Rama po kërkon të çmontojë Gjykatën Speciale, duke dalë kështu edhe kundër standardeve të BE-së.

BE ka shprehur mbështetje për punën Dhomave të Specializuara dhe Zyrën e Prokurorit të Specializuar të Kosovës, njësoj si edhe për SPAK-un.

SPAK

Gjithashtu, BE ka shprehur edhe gatishmëri për ta ndihmuar Gjykatën Speciale, por kreu i qeverisë shqiptare ka dalë me shpatë në dorë kundër saj.

Tani Edi Ramës i ka mbetur vetëm të shpallë Fatmir Xhafajn dhe komisionin e tij të përkohshëm palamentar si udhëheqës për çmontimin e tribunalit të Hagës.

Duke qenë se me SPAK-un nuk po ia del, po çmonton strukturat e drejtësisë më të vjetër në Europë, për të ardhur më pas në Tiranë, për të çmontuar SPAK-un./ CNA