E fundit!

19:42 Aktualitet

52 ditë protestë kundër qeverisë/ Qytetarët marshojnë drejt Kryeministrisë

Në sheshin “Skënderbej” janë grumbulluar qytetarët për pro...

Qeveria miraton Planin e veprimit të Schengen-it për periudhën 2026-2030

29 Janar 2026, 22:25, Politikë CNA

Qeveria miraton Planin e veprimit të Schengen-it për periudhën

Qeveria shqiptare ka miratuar Planin e veprimit të Schengen-it për periudhën 2026-2030.

Vendimi është publikuar edhe në Fletoren Zyrtare (Lexo këtu)

Bazuar në dokument, Plani i Veprimit Schengen (PVS) përshkruhet si mjeti qendror që udhëheq përpjekjet e Shqipërisë drejt BE-së.

Sipas përcaktimeve, ky plan luan një rol të dyfishtë: ndihmon vendin të përmbushë standardet e pranimit në BE, ndërkohë që përgatitet, gjithashtu, për pranim në zonën Schengen.

Shtyllat e planit

Menaxhimi i kufijve: Modernizimi i infrastrukturës në pikat e kalimit dhe harmonizimi i plotë i legjislacionit me atë të BE-së.

Sistemet e informacionit: Krijimi i bazave të të dhënave të ndërveprueshme me sistemet europiane (SIS, VIS), duke rritur sigurinë kibernetike.

Politika e vizave: Përafrimi i regjimit të vizave të Shqipërisë me politikën e përbashkët të BE-së.

Politika e kthimit: Rritja e efikasitetit në kthimin e emigrantëve të parregullt dhe respektimi i të drejtave të njeriut.

Armët e zjarrit: Harmonizimi i plotë i ligjit për armët me acquis të BE-së dhe gjurmimi digjital i tyre.

Antikorrupsioni: Reforma për integritetin e stafit në pikat kufitare dhe agjencitë ligjzbatuese.

Kontrolli i armëve, digjitalizim dhe gjurmim; Një nga prioritetet madhore mbetet kontrolli rigoroz i armëve të zjarrit. Sipas dokumentit, Shqipëria tashmë ka regjistruar mbi 75% të poseduesve të armëve në regjistrin elektronik kombëtar “SIMA”. Megjithatë, objektivi i ri për periudhën 2026-2030 është harmonizimi i plotë me legjislacionin e BE-së. Për këtë, Policia e Shtetit do të përdorë sisteme të avancuara si “iBase” dhe “iArms” të Interpolit, si dhe sistemin e ri “Traffic” për informacionin balistik.

Antikorrupsioni, fokus te sektorët me risk të lartë: Kapitulli 10 i dokumentit i dedikohet funksionimit të autoriteteve antikorrupsion. Strategjia e re 2024-2030 targeton fushat më problematike: pronat, prokurimet publike, shëndetësinë, arsimin dhe doganat.

Drejtësia: Në fushën e drejtësisë penale, Shqipëria konfirmon thellimin e bashkëpunimit me Eurojust dhe Zyrën e Prokurorit Publik Evropian (EPPO). Dokumenti vlerëson se Shqipëria është lider në Ballkanin Perëndimor për numrin e ekipeve të përbashkëta hetimore. Objektivi është që deri në vitin 2027, legjislacioni shqiptar për bashkëpunimin gjyqësor të jetë plotësisht i harmonizuar me atë të BE-së, duke lehtësuar ekstradimet dhe njohjen e ndërsjellë të vendimeve gjyqësore.

Financimi dhe monitorimi: Kostoja e këtij transformimi rrënjësor do të mbulohet nga Buxheti i Shtetit dhe nga fondet e donatorëve (BE). Për të garantuar suksesin, plani parashikon dy momente kyçe kontrolli: një vlerësim afatmesëm në fund të vitit 2027 dhe një vlerësim përfundimtar në vitin 2030./CNA