VIDEO-Publikohet kamera e fshehtë e Chris LaCivita-s/ “The Guardian” nxjerr bisedat

2 Maj 2025, 07:51, Politikë CNA

VIDEO-Publikohet kamera e fshehtë e Chris LaCivita-s/ “The

Media ndërkombëtare "The Guardian" ka publikuar një artikull ku bën me dije se një nga arkitektët e fitores së Donald Trump në vitin 2024, ndërkohë që është i angazhuar me fushatën e PD-së në Shqipëri gjithashtu ka këshilluar Peter Dutton dhe partinë liberale në Australi rreth "çështjeve strukturore" përpara zgjedhjeve.

Strategu republikan Chris LaCivita duket se ka rënë në kurthin e disa gazetarëve të cilët janë hequr sikur janë klientë për punë konsulence politike duke pohuar se ka qenë në Australi dhe askush s'e dinte këtë gjë.

Kamerat e fshehta janë publikuar të enjten nga organizatat me seli në Europë, Correctiv dhe Qendra për Raportimin e Klimës.

“Isha në Australi dy javë më parë duke ndihmuar partinë liberale atje, me disa nga problemet e tyre strukturore që kishin me Peter Dutton.

Gjërat duket se po lëvizin disi në drejtimin e duhur atje… këto përpjekje janë të natyrës rreptësisht politike dhe nuk kërkojnë që unë të angazhohem me qeverinë e Shteteve të Bashkuara. Asnjë nuk e dinte që isha aty”, tha LaCivita më 16 prill në të parën nga dy telefonata.

Fushata zgjedhore e Australisë filloi më 28 mars.

Sipas bisedës në video, LaCivita u thotë gazetarëve se e bëri udhëtimin në mënyrë diskrete.

Ai e krahason këtë me raportimet e medias rreth punës së tij të paguar me partinë opozitare të Shqipërisë, shkruan "The Guardian".

“Nuk jam i interesuar për vëmendje. Unë punoj me diskrecion. U përpoqa edhe në Shqipëri të mos kisha shfaqje, por aty shqiptarët kanë një tjetër mendësi. Është një nga ato vende ku ndërhyrja amerikane në zgjedhje pritet dhe mirëpritet. Në vende të tjera jo dhe aq shumë. Çdo klient është ndryshe, por… Ata nuk e dinin kurrë se isha atje”, tha LaCivita.

Në një deklaratë, LaCivita i tha "Guardian Australia":

“Unë nuk kam punuar dhe nuk punoj për Partinë Liberale të Australisë. Unë ofroj konsulencë për një gamë të gjerë interesash biznesi - disa në Australi, disa në SHBA etj., në terma të një partie politike - nuk e kam bërë këtë. Gjithashtu, nuk e kam takuar kurrë z. Dutton, por shpresoj ta takoj kur të zgjidhet kryeministër.”/ CNA