web counter
LEXO PA REKLAMA!

SHKARKO APP

App Store
Google Play

E fundit!

x

Nga abuzimi me fondet tek shpenzimet për udhëtimet/ Berisha, ‘i qepet’ pas Ramës

24 Tetor 2022, 18:00, Politikë CNA
Nga abuzimi me fondet tek shpenzimet për udhëtimet/ Berisha, ‘i
Kryetari i Partisë Demokratike, Sali Berisha

Kryetari i Partrisë Demokratike, Sali Berisha, është duke vijuar takimin me disa studentë në selinë blu, ku nuk është kursyer aspak ndaj kryeministrit Edi Rama.

Berisha akuzoi Ramën se ka rikthyer kontrollin qeveritar tek universitetet, ndërsa pretendon se ka abuzuar me fondet dhe me emërimet në borde.

“Kjo është një periudhë shumë e vështirë për universitetet tona. Kjo sepse në këto 8 vite, në mënyrën më të pamerituar u ndoq një politikë absolutisht rrënuese për këto universitete. U rikthyen nga Rilindja parimet atavike të tejkaluara që nga vitet ‘70-‘80 të shekullit të shkuar në vendet e lira. U rikthye parimi i kufizimit dhe pranimeve të kufizuara në universitete dhe jo i dyerve të hapura të cilin vendet e lira e kanë vendosur nga mesi i viteve ’70 e gjer sot.

U rikthye parimi i kontrollit qeveritar i universiteteve nëpërmjet komisarëve, dikur quheshin kancelarë dhe sot quhen administratorë, të cilët nuk veprojnë në përputhje me interesat tuaja, me interesat e pedagogëve tuaj, me interesat e konsolidimit të mësimdhënies dhe kërkimit shkencor, por zbatojnë urdhrat e qeverisë dhe Ministrisë, duke rrëmbyer edhe fondet që krijon universiteti nga burime të ndryshme, përfshirë tarifat tuaja. E njëjta gjë ndodhi me bordet, u emëruan militantë dhe këto së bashku morën atë që duhet liri akademike”, u shpreh ai.

Lideri i demokratëve u ndal gjithashtu edhe tek protesta e pedagogëve, për të cilët pretendon se paguhen 4 herë më pak se shoferi i Fondit Shqiptar të Zhvillimit.

Teksa pedagogët kërkojnë rritje page, Berisha theksoi se Rama po shpenzon 200-300 mijë euro me udhëtime.

“Jemi në mes të një beteje. Pedagogët po luftojnë për të mbrojtur universitetet, për të mbrojtur të ardhmen e vendit. Sindikatat kanë bërë një thirrje dhe fatmirësisht ka një reagim shumë pozitiv. Këtyre sindikatave duhet t’u bashkëngjiten studentët në mënyrë të fuqishme. Çfarë keni ju më shumë se sa studentët në Kosovë të cilëve qeveria vetëm për krizën u dha 100 euro në muaj subvencion?

Por shumë normale, sepse ti student me ato para që të jep familja sot, e ke biletën 2 herë më shtrenjtë për të lëvizur, e ke qiranë më të lartë, e merr litrin e vajit 3-4 mijë sot. Si të mos kujtohet t’ju ndihmojë ju, por udhëton me avion-taksi 200-300 mijë euro në udhëtim, në një kohë kur kryeministri i Austrisë udhëton me avion të linjave tregtare dhe ministrat në ‘economy class’, ndërsa ministrja e tij shkon dhe bën 15 rrugë për 15 mbledhje partie në Peshkopi me helikopter se nuk shkon dot me makinë. A mund të pranoni ju që një pedagog i juaj të marrë 4 herë më pak se shoferi i FSHZH. Kjo është e vërteta”, deklaroi ai./ B.A. – CNA.al





Lajmet e fundit nga