web counter
LEXO PA REKLAMA!

SHKARKO APP

App Store
Google Play

E fundit!

x

“Me zor mbushim komisionet”/ Anëtari i PD-së-Berishës: Promovohen humbësit, u morëm 1 muaj kot me Peleshin

2 Dhjetor 2025, 22:54, Politikë CNA

“Me zor mbushim komisionet”/ Anëtari i

Anëtari i PD-së Erald Kalemaj gjatë foltores së kreut të PD-së pasditen e sotme i ka paraqitur Berishës tre pikat të cilat shqetësojnë atë dhe çdo anëtar tjetër të kësaj partie.

Kalemaj tha se Berisha duhet tu kërkonte llogari deputetëve sipas zonave për dështimin e tyre në zgjedhje.

Sipas tij deputetët që nuk morën rezultatet e duhura duhet të shkarkoheshin për tu hapur vend të rinjve.

Ai u shpreh se kjo është një nga arsyet pse demokratët janë të pamotivuar dhe të demoralizuar saqë kur vijnë zgjedhjet mezi mbushin komisionet.

Po ashtu ai ngriti shqetësimin se deputetët nuk zhvillojnë takime me strukturat dhe harxhojnë kohën kot duke u marrë 1 muaj rresht dhe duke shfrytëzuar të gjithë energjinë për të përgatitur një kërkesë për Peleshin ndërkohë që ka shumë çështje të tjera të cilat mund të trajtohen.

“Unë mendova se kur filluat Foltoren për herë të parë, të gjithë ne si struktura kishim shumë entuziazëm që kjo anë në Partinë Demokratike do të merrte një drejtim. Deputetët do të ndaheshin në zona dhe kush nuk merrte rezultatet e duhura, do të shkarkohej ose nuk do t’i jepej mundësia të vazhdonte.

Është shumë e thjeshtë të rrish me rrogën e deputetit në opozitë, por shumë e vështirë për ne demokratët e thjeshtë.
Kjo analizë është motivim për ne që jemi të rinj dhe që jemi aktivizuar pa e njohur as pushtetin. Në momentin që unë shoh se një person që nuk ka pasur rezultate të mira vazhdon e promovohet në PD, unë normalisht si i ri dekurajohem. Kjo është arsyeja pse shumë njerëz janë të dekurajuar dhe mezi arrijmë të mbushim komisionet.


Resurset e Partisë Demokratike janë duke u fokusuar vetëm në disa tema të caktuara. Jam dakord që kjo qeveri është hajdute, por PD nuk ka vetëm një departament për këtë. Kjo parti që merr 600–700 mijë vota nuk ka vetëm një temë për të folur. Ne u çuditëm që bëmë një mbledhje të tërë vetëm për shkarkimin e Niko Peleshit, një harxhim i panevojshëm i resurseve tona.


Struktura ka kryetar, sekretar, ka funksionet e veta. Në momentin që zgjidhet një kryetar në njësi, ai njeri duhet të jetë deputet i zonës – kështu krijohet motivim dhe vazhdimësi. Nuk ka logjikë që deputetët vijnë për gjashtë muaj dhe ikin, se nuk po lidhemi dot me ta.


Ne kemi nevojë për një hierarki të qartë, sepse të gjitha numrat dhe mbrojtja e votës mbahen nga struktura. Simpatizanti e hedh votën, por nëse ne nuk jemi në komisione dhe nuk i numërojmë votat, nuk i mbrojmë dot. Këto janë tre pikat kryesore që desha të them. Faleminderit shumë”, tha ai./ CNA





Lajmet e fundit nga