E fundit!

17:06 Sociale

Ndryshon moti në korrik/ Stuhia e madhe i afrohet Ballkanit

E gjithë Europa Jugore do të përballet gjatë kësaj jave me...

Manja: Nuk ka prova për intimidim të dëshmitarëve nga Balluku

9 Mars 2026, 10:55, Politikë CNA

Kryetari i Komisionit të Ligjeve, Ulsi Manja, ka reaguar ndaj pretendimeve për intimidim të dëshmitarëve nga Belinda Balluku, duke deklaruar se në materialet e paraqitura nuk rezulton një fakt i tillë.

Duke folur në mbledhjen e Grupit Parlamentar të PS-së, Manja theksoi se duke respektuar ruajtjen e sekretit hetimor është paraqitur vetëm një procesverbal ku dy shtetase bisedojnë mes tyre lidhur me dëshminë që njëra prej tyre ka dhënë gjatë hetimit në prokurori.

Sipas tij, nga procesverbali dhe nga deklarimet e vetë shtetases që pretendohet se është intimiduar, nuk rezulton se ajo është kërcënuar apo intimiduar nga deputetja Balluku. Manja shtoi se përmendja e “kabinetit” si burim intimidimi është një nocion abstrakt, ndërsa hetimi penal nuk zhvillohet mbi bazën e një termi të tillë.

Ai theksoi gjithashtu se në deklarimin e përmendur, shtetasja ka nuk ka thënë se do t’i qëndrojë dëshmisë së saj dhe nuk do ta ndryshojë atë, edhe nëse do të ketë tentativa për intimidim.

Manja u ndal edhe te statusi procedural i dëshmitarëve, duke sqaruar se personi në fjalë ka statusin e së pandehurës në këtë procedim penal. Sipas tij, në raste të tilla, deklarimet e një të pandehureje në të njëjtin procedim penal duhet të merren me rezervë.

"Duke i qëndruar besnik ruajtjes së sekretit hetimor na paraqitet një procesverbal ku dy shtetase bisedojnë me njëra-tjetrën lidhur me dëshminë që njëra nga ato ka dhënë gjatë hetimit në prokurori, e cila pretendon se kjo dëshmitare është intimiduar. Nuk ekziston nga procesverbali as nga deklarimet e shtetases që është intimiduar nga deputetja dhe kur thuhet nga kabineti është nocion abstrakt. Hetimi penal nuk zhvillohet mbi kabinetin, por dhe pretendimi se është intimiduar nga persona të fortë, në atë që u deklarua nuk thuhet unë do t'i qëndroj dëshmisë sime dhe nuk e ndryshoj edhe nëse intimidohem sot.

E dyta, lidhur me dëshmitarët. Është me rëndësi të them ajo ka statusin e së pandehurës në këtë procedim penal. Thëniet e një të pandehure në të njëjtin procedim merren me rezervë”, tha Manja./ CNA