"Kjo është puna që di të bëj më mirë"/ Balla: Ftojmë opozitën të propozojë anëtarët e Këshillit të Rregullores

15 Shtator 2025, 14:01, Politikë CNA

"Kjo është puna që di të bëj më

Kryetari i Grupit Parlamentar të Partisë Socialiste, Taulant Balla, në një deklaratë për mediat pas përfundimit të mbledhjes së grupeve parlamentare tha se nuk është ende e qartë se kur do të zhvillohet seanca plenare pasi fillimisht duhet të kalojë etapa e nesërme.

Balla i shtriu edhe një herë dorën opozitës për të propozuar emrat e anëtarëve të Këshillit të Rregullores.

"Aty ndodh konsultimi, që një propozim të marrë jetë duhet propozuar, morëm iniciativën dhe ftuam opozitën. Që në krye të mbledhjes kryetari i Kuvendit i kërkoi opozitës që të propozonte emrat e anëtarëve të Këshillit të Rregullores sepse komisionet janë i vetmi vend ku mund të takohemi me opozitën.

Kuvendi i Shqipërisë duhet të ketë një organizim të ri, të reflektojnë edhe momentin historik që kemi, nevojën për t’iu përqasur marrëveshjes për anëtarësimin në BE, që më në fund kemi një komision parlamentar për diasporën.

Kemi zhvilluar 2 seanca, në të tretin do të ngremë institucionet.

Nuk e kemi të qartë kur do të jetë seanca e radhës. Na duhet që brenda kësaj jave të shqyrtohen dekretet për qeverinë dhe programin, na duhet të kemi gati konferencën e kryetarëve për të diktuar kohën e debatit. Është domosdoshmëri të kalojmë këtë etapë të parashikuar nesër, që brenda kësaj jave të mbyllim proceset e tjera," u shpreh Balla.

Balla iu përgjigj edhe Bardhit, i cili tha se mbledhjet janë thirrur për tri ditë sikur vendi të ishte në emergjencë.

"Për një çështje si riorganizimi i Kuvendit nuk ndaj të njëjtin mendim.

Mendoj se sipas një tradite parlamentare e kemi ndryshuar me dakordësi dhe propozim të kryetarit të opozitës të asaj kohe ndryshuam rregulloren", tha ai.

Gjithashtu kreu i Grupit Parlamentar të PS-së iu përgjigj edhe akuzave për komisionet e kryesisht atë të Çështjeve Europiane. Balla tha se kaloi nga i dorës së dytë në parësor.

"Propozimi i Ramës është një ngritje e nivelit më të lartë të mundshëm të komisionit për çështjet europiane. Kur ka nisur ky komision 20 vjet më parë, ishte një komision ku anëtarësia nuk përllogaritej, ishte komision i dorës së dytë. Bëhet komisioni më i rëndësishëm. Ky komision duhet t’i takojë mazhorancës sipas modelit të Bundestagut," tha Balla.

Kreu i Grupit të PS-së foli edhe për rimarrjen e postit duke e cilësuar se është ajo që di të bëjë më mirë.

"Besoj që bashkë me ju dhe bashkë me të gjithë duhet të bëjmë atë që dimë të bëjmë më mirë.

Kam bërë punë të shkëlqyer së bashku ne kryeministrin Rama edhe në postin e ministrit të Shtetit, por kjo është një detyrë që më pëlqen shumë", tha Taulant Balla./CNA