Divorci me Metën dhe film për jetën/ Kryemadhi: Politika na ndau, ndërhyrjet politike kanë qenë kryesoret

23 Prill 2025, 14:22, Politikë CNA

Divorci me Metën dhe film për jetën/ Kryemadhi: Politika na ndau,

Deputetja e Partisë së Lirisë, Monika Kryemadhi, në një dalje televizive ka folur për divorcin e saj me Ilir Metën. Gjithashtu Kryemadhi ka thënë se do të bëhet dhe një film për jetën e saj dhe të Ilir Metës.

Kryemadhi tha se bashkëjetesa me kreun e PL-së nuk ka qenë si e gjithë çifteve të tjera dhe tregoi se politike ishte ajo që i bashkoi dhe i ndau.

Më tej, Kryemadhi u ndal dhe te filmi që do të realizohet për jetën e saj dhe të Metës, të cilin e cilësoi si një projekt shumë të vështirë.

Sa u përket aktorëve që do të luajnë në këtë film, Kryemadhi tha se nuk është vendosur ende. E pyetur për fundin e filmit, deputetja tha se as ajo vetë nuk e di pasi jeta vazhdon.

“Bashkëjetesa ime me Ilir Metën nuk ka qenë bashkëjetesë si të gjitha çiftet e tjera. Sigurisht që ka qenë e rrëmbyer. Ndoshta të qenit gjithë jetën, çdo vit ne kishim nga një sfidë, luftë, përplasje, njëherë fushatë, njëherë problematikë, nuk arritëm dot ndoshta edhe të jetonim bashkë, të shihnim një këndvështrim tjetër.

Gjithmonë kemi qenë shokë, politika ka qenë ajo që na ka lidhur, ajo ka qenë edhe që na ndau. Ndërhyrjet politike kanë qenë kryesoret, disa për të marrë një mandat deputeti, disa të tjerë për të qenë më pranë Metës, disa të tjerë për të menduar se Monika na ka prishur punë ne, na ka shkatërruar karrierën për të ndërtuar karriera të tjera.

Të provojmë në këtë filmin e parë që do të realizoj. Sigurisht që do të jetë i vështirë, në menaxhimin e projektit, e më pas për ta rindërtuar në një këndvështrim artistik.

'To be continued', pasi jeta vazhdon dhe as Monika nuk e di", tha Kryemadhi./ CNA