E fundit!

12:20 Aktualitet

EKSKLUZIVE/ Ja kandidatët për postin e nëndrejtorit në Policinë e Shtetit

CNA ka zbuluar ekskluzivisht se cilët do të jenë kandidatë...

Dhurata Çupi, akuza Ramës: Zgjidhja është qeveria teknike

19 Korrik 2024, 13:05, Politikë CNA

Dhurata Çupi, akuza Ramës: Zgjidhja është qeveria teknike

Dhuarata Çupi

Deputetja e PD-së, Dhurata Çupi, në një deklaratë nga selia blu, u shpreh se në skanerin e fundit të Departamentit të Shtetit Amerikan, qeveria e Edi Ramës rezulton, jo për herë të parë, si ndër më të korruptuarat.

Sipas saj, ka një mënyrë për t’i dhënë fund korrupsionit kapilar, që nis nga maja e qeverisë dhe janë zgjedhjet e lira, të pandikuara nga korrupsioni qeveritar dhe partneri i tij kryesor, krimi i organizuar.

Ajo theksoi se një qeveri teknike, që përgatit zgjedhje të lira është interesi më i lartë i shqiptarëve.

Deklarata e plotë:

Në skanerin e fundit të Departamentit të Shtetit Amerikan, qeveria e Edi Ramës rezulton, jo për herë të parë, si ndër më të korruptuarat. Biznesi në Shqipëri, thuhet në raport, operon në një mjedis të rrezikshëm për shkak të korrupsionit.

Propaganda e qeverisë nuk e fsheh dot problemin e madh të mungesës së konkurrencës së ndershme për shkak të tenderëve korruptivë të paracaktuar.

Siç thekson raporti, investitorët e huaj e perceptojnë Shqipërinë si një vend të vështirë për të bërë biznes. Korrupsioni në sektorin publik, në drejtësi, në prokurimet publike, konkurrenca e pandershme, informaliteti shumë i përhapur në ekonomi, janë ndër problemet kyçe.

Me Edi Ramën kryeministër gjithçka është vendosur në dispozicionin e pushtetit personal, që nga shteti i kapur në çdo hallkë, deri te krimi i organizuar, që mbetet aleati kryesor i qeverisjes këto 12 vjet.

Raporti i Departamentit të Shtetit vë në dukje se faktorët që dëmtojnë më shumë konkurrencën në treg janë trafiku i drogës, kontrabanda, evazioni fiskal dhe korrupsioni. ‘Raportimet për korrupsion në prokurimet qeveritare janë të zakonshme. Investitorët raportojnë shpesh raste të korrupsionit qeveritar, që vonon dhe parandalon investimet në Shqipëri’, – shkruan raporti. Po aty theksohet se PPP-të janë një nga mënyrat më të përdorura të qeverisë për kontratat korruptive, që kanë ulur mundësitë për konkurrencë në treg.

Raporti amerikan nuk lë pa cekur as plagën e shpopullimit: ‘Emigrimi i fuqisë punëtore të re dhe të kualifikuar ka krijuar mungesë të fuqisë punëtore që ndikon në perspektivat e investimeve.’

Për herë të parë një shqetësim i tillë ngrihet kaq hapur. Emigrimi i të rinjve dhe i profesionistëve ka në bazë korrupsionin e qeverisë. Është një revoltë e heshtur për të refuzuar këtë sistem të kalbur, ku bëjnë përpara vetëm ata që i shërbejnë pushtetit në mënyrë të paligjshme dhe të pandershme.

Ka një mënyrë për t’i dhënë fund korrupsionit kapilar, që nis nga maja e qeverisë. Janë zgjedhjet e lira, të pandikuara nga korrupsioni qeveritar dhe partneri i tij kryesor, krimi i organizuar.

Një qeveri teknike, që përgatit zgjedhje të lira, është interesi më i lartë i shqiptarëve.

Shqiptarët meritojnë një qeveri të pakorruptuar, që respekton rregullat e ekonomisë së tregut, që ndëshkon krimin dhe i hap derën kthimit në Shqipëri të mijëra të rinjve dhe mijëra profesionistëve të larguar nga aleanca mes krimit të organizuar dhe narko-qeverisë.