E fundit!

10:35 Live Updates

Hijet e Erion Veliajt në protestë

Veliaj përmes Arta Dades refuzon “antimiti...

Denoncimi i PD-së për blerje votash në Korçë/ Reagon i riu: S'ka ardhur njeri për lekë, e thashë nga frika

9 Maj 2025, 10:05, Politikë CNA

Denoncimi i PD-së për blerje votash në Korçë/ Reagon

Pas denoncimit publik të bërë nga kandidati për deputet i PD-së, Edmond Spaho, ka ardhur reagimi i familjes Kreka. Djali i vogël i kësaj familjeje, protagonist në videon e publikuar, ka hedhur poshtë të gjitha fjalët që ka thënë në video.

Kleant Kreka shpjegon se për shkak të frikës ka gënjyer në ato që ka thënë, ndërsa shprehet se nuk ka ardhur asnjë për t’i ofruar lekë.

"Dje kaluan disa veta atje në rrugë, dola që të takoja ndonjë e pashë që bënin video. Nga frika i thashë nja dy llafe koti, por nuk janë të vërteta ato. Në shtëpi s’ka ardhur askush dje. Jo lekë asnjë, për lekë asnjë s’ka ardhur këtu. Vetëm nga frika u kam thënë se s'kisha si t’u thoja, ishin shumë e s'kisha si u ikja. Kandidatin as si fytyrë s’e njoh, s’e kam parë ndonjëherë", tha Kleant Kreka.

Ndërkohë, djali i madh i familjes Kreka thotë se situata është shkaktuar nga frika që vëllai i vogël ndjeu përballë personave të panjohur që e pyetën.

Sipas tij, për ngjarjen është informuar vetëm pasi pamjet u shpërndanë në rrjetet sociale. Ai gjithashtu mohon që të jetë marrë ndonjë premtim për përfitime financiare nga ndonjë kandidat.

"Kjo video është gjë kot. Nuk është e vërtetë, se ne jemi pa baba, na shikojnë të vegjël e i bëjnë këto. Policia erdhi mbrëmë në orën 1:00 të natës në shtëpi, kemi bërë debate këtu, na çuan në Maliq. Videon e ka bërë nga frika se kishte hall se e rrihnin. Asnjë deputet s'ka ardhur këtu. I kam takuar në rrugë, më ka thënë që jam deputet, më ka dhënë një letër e i thashë që s'dua as letër, asgjë, se s'merrem me këto punë. Nuk është e vërtetë ajo për lekët. I tronditur ndihem, atje e kemi mendjen të tërë", u shpreh Landi Kreka.

Nëna e dy të rinjve, Mimoza Kreka, shpjegon se asnjë kandidat për deputet nuk ka hyrë në banesën e saj ditën e djeshme. Ajo pranon se fëmijët mund të kenë takuar kandidatin jashtë shtëpisë, por në asnjë rast nuk është bërë ndonjë ofertë për para.

"Jo, nuk jam takuar me asnjë kandidat. Videoja s'është aspak e vërtetë, mbase nga frika djali i ka thënë ato. Mua s'më ka premtuar dikush për lekë. Pasi e mora vesh nuk ndihem mirë, për ne si prindër është e vështirë se fëmijët tanë i mësojmë për mirë, jo për keq", tha nëna e dy të rinjve.

Mbrëmjen e djeshme, Edmond Spaho publikoi dy video të realizuara nga disa persona që pretendonin se në fshatin Podgorie po bëhej blerje votash në favor të PS-së dhe kandidatit Arian Jaupllari.

Lidhur me këtë ngjarje, policia ka nisur procedurat hetimore për të zbardhur rrethanat, ndërsa çështja pritet të hetohet nga një prokuror i SPAK-ut, i caktuar pranë Prokurorisë së Korçës./ CNA