Deklaratat e Ramës/ Nallbati: I them këtij skërfyelli dy metra të gjatë, nuk më tremb dot me këto lloj inskenimesh

6 Maj 2025, 14:30, Politikë CNA

Deklaratat e Ramës/ Nallbati: I them këtij skërfyelli dy metra

Kandidati i PD-së për Qarkun e Korçës, Bledjon Nallbati, ka dhënë një reagim për mediat pas seancës ndaj vëllait të tij në Gjykatën e Korçës.

Nallbati, referuar konfliktit ku u përfshi ai dhe vëllai i tij, tha se është e inskenuar nga Rama dhe Peleshi. Lidhur me aktakuzën, Nallbati deklaroi se një punonjës ka firmosur me urdhër i detyruar. Për këtë kandidati i PD-së i bëri thirrje të shkojë në SPAK ose do ta çojë ai si rast.

Gjithashtu Nallbati iu përgjigj dhe Ramës për deklaratat e bëra ditën e djeshme nga Devolli.

Nallbati u shpreh se Rama nuk e tremb dot me këto lloj inskenimesh. Kandidati i PD-së tha se Rama do ta marrë përgjigjen nga ata dhe devollinjtë më 11 maj.

“Sikundër e dëgjuat prokurorja e çështjes, ish-vartëse e Niko Peleshit, personit që u mor personalisht me inskenimin dhe falsifikimin e kësaj akuze që nuk qëndron, shkon para gjykatës dhe thotë që nuk i kam marrë ende pamjet, por them të caktohet një masë sigurie. Thotë vlerësova si të drejtë arrestimin në flagrancë për vepra që nuk qëndrojnë dhe kërkoj që të caktohet një masë sigurie kundër një personi pavarësisht se ende nuk i administroj këto akte. Më vjen keq që gjyqtarja u bë pjesë e kësaj maskarade dhe inskenimi politik. Kuptohet pse sigurisht. Ju e dëgjuat dje kryeministrin Rama në Devoll. Erdhi për t'u kërkuar votën devollinjve, foli një orë e ca dhe nuk përmendi asnjë gjë se çfarë ka bërë për Devollin dhe devollinjtë, por u mor vetëm me këtë rast. Kjo u inskenua që Edi Rama të shmangte përgjegjësinë e tij për keqqeverisjen 12-vjeçare dhe të merrej me një tallava të tillë siç merret gjithmonë. E pyes prokuroren dhe gjyqtaren a ma justifikojnë dot pse me urdhër të drejtorit të policisë, dhe këtë e ka pranuar prokurorja në sallën e gjyqit. Drejtori i policisë delegoi çështjen në Korçë, ndërkohë që ka kompetencë territoriale Komisariati i Devollit. Që këtu duket që është marrë personalisht dhe është e inskenuar. Unë e kuptoj, drejtori i policisë, Niko Peleshi, janë eunukë, të paburrë që marrin dhe zbatojnë urdhra të verbër nga shefi i tyre Edi Rama. Unë atyre do t'ua jap përgjigjen ligjërisht, por kjo çështje sapo ka filluar. Kanë marrë më qafë një punonjës që ka firmosur shkresat mbi këtë aktakuzë, me urdhër dhe ata e dinë mirë. E ftoj atë të shkojë pa qenë nevoja ta çoj unë në SPAK.

Sot i them Edi Ramës, këtij skërfyelli dy metra të gjatë, hajdutit më të gjatë që ka njohur ndonjëherë politika, që nuk më tremb dot me këto lloj inskenimesh. Unë e di që je djali i Kristaqit dhe nipi i Spiros që jo vetëm kanë burgosur, por kanë marë vendime për t’i varur në litar. Mbas datës 11 maj ti mund të shërbesh vetëm për një punë për të trembur gallofët nëpër arra sepse je fiks për atë punë, por as këtë s'do të mund ta bësh sepse do të jesh në burg për çdo gjë që ke bërë në këto 12 vite. Unë dhe vëllai im as jemi trembur dhe as do të trembemi asnjëherë. The vëllai i Bledjon Nallbatit, një njeri gjysmë metër i gjatë është kapo. Jo ai, as është gjysëm metër i gjatë dhe nuk është kapo, është kapedan sepse pret e përcjell këdo dhe e ndihmon me çfarë mundet. Ndërkohë që vëllai yt dymetrosh dihet botërisht i akuzuar nga agjencitë ndërkombëtare të inteligjencës si kryemafiozi, narkotrafikanti i kokainës në Shqipëri. Pra, vëllai im dhe yti janë ndryshe ashtu siç unë dhe ti ndryshojmë shumë. Ti je frikacak dhe burracak, ndërsa unë dhe vëllai im nuk jemi si ti. Do ta marrësh përgjigjen nga ne dhe qytetarët e Devollit mbas datës 11 maj”, tha Nallbati./ CNA