Berisha kërkon protesta për “kokën e këputur” të Salianjit

26 Shtator 2024, 19:42, Politikë CNA

Berisha kërkon protesta për “kokën e këputur”

Kreu i PD-së Sali Berisha

Kreu i PD-së Sali Berisha në tubimin e radhës, nga ballkoni i banesës së tij u ka kërkuar të gjithë opozitarëve, demokratëve të ngrihen në protesta, pas vendimit të Gjykatës së Apelit e cila dënoi me një vit burg Ervin Salianjin.

“Goditja me proces politik e Ervin Salianjit është një akt i shëmtuar, një hakmarrje e verbër politike e Edi Ramës dhe Fatmir Xhafajt. Është një kushtrim për çdo opozitar që konsideron krimin, drogën si rrezik madhor për qënien e tij, ekzistencën e tij, për ligjet për rendin, kushtetutën dhe vendin.

Kjo goditje në serinë e goditjeve të opozitës të arrestimeve politike dhe burgosjes politike është një kushtrim, është një apel për të gjithë opozitën të ngrihet në këmbë o sot o kurrë. Është radha jonë. Sonte u bëj thirrje shqiptarëve kudo që janë, opozitarëve kudo që janë të ngrihemi dhëmbë për dhëmbë me këta kriminelë dhëmbë për dhëmbë me këta trafikantë horra dhe banditë.

Të lëmë mënjanë gjithçka, të nisim betejën për ekzistencën e opozitës, ligjit, për kushtetutën, për sovranitetin e Shqipërisë”, tha Berisha.

Pra, Berisha po kërkon që qytetarët dhe opozitarët të dalin në protesta për “kokën e këputur” nga drejtësia të Ervin Salianjit.

Për “kokën e këputur” nga trupa gjykuese që në fakt është e njëjta që i dha vulën Berishës në qershor dhe që kreu i PD-së e vlerësoi duke shkruar: “Këtij vendimi historia do t’i njohë meritën e madhe të parandalimit të një mynxyre të vërtetë për vendin, kapjen e pluralizmit politik nga partia shtet”

Pyetja që lind është e thjeshtë: Kur nuk protestoi për vendimin e vulës pse proteston për vendimin ndaj Salianjit?

A është çështja e Salianjit më e rëndësishme se vula dhe sigla e PD-së?

Berisha kërkon protesta për “kokën e këputur”

Kjo foto është në 8 janar të 2022 kur Sali Berisha dhe demokratët nuk arrinin të merrnin selinë e PD në atë kohë, ndërkohë Salianji kishte dalë me dru të godiste Sali Berishën.

Kujtojmë se Gjykata e Apelit sot mori një vendim të formës së prerë dhe pasi prokurori të zbardhë vendimin pritet që të bëhet dhe arrestimi i Ervin Salianjit i dënuar me një vit burg për kallëzim të rremë./ CNA