A do ta votojë PD shkarkimin e Veliajt?/ Këlliçi zbulon vendimin e opozitës

19 Shtator 2025, 07:34, Politikë CNA

A do ta votojë PD shkarkimin e Veliajt?/ Këlliçi zbulon

Deputeti i PD-së, Belind Këlliçi, ka deklaruar se opozita do të votojë shkarkimin e kryebashkiakut Erion Veliaj.

I ftuar në "MCN TV", Këlliçi është shprehur se aksionin për çmontimin e Veliajt, opozita e ka nisur që kur janë bërë denoncimet për rrugën "Xhon Belushi" etj.

Këlliçi theksoi se qëndrimi i opozitës është i prerë dhe këshilltarët e PD-së kanë depozituar kërkesë për shkarkimin e Veliajt, me arsyetimin ligjor për mosparaqitjen tre muaj në punë.

“Ne aksionin për çmontimin e Veliajt e kemi nisur që kur kam fituar primaret për të qenë kandidat. SPAK zyrtarisht ka kthyer për herë të dytë në Prokurorinë e Tiranës, dosjen që ka qenë pikënisja e denoncimeve të mia, për rrugën 'Xhon Belushi', që ishte tenderi i hapur, por ndërkohë ajo po përfundonte. Është pyetur Mazniku, SPAK ia ka kaluar në Prokurori për moskompetencë. Të gjithë aksionin për Veliajn e kemi nisur që në janar 2023. Rrugës i janë vënë në shpinë, Rama, Balluku, Mazniku dhe ku di unë.

Qëndrimi ynë është i prerë, këshilltarët e PD-së kanë depozituar kërkesë për shkarkimin e Veliajt, me po këtë arsyetim ligjor për mosparaqitjen tre muaj në punë. Në 12 maj ne e kemi depozituar kërkesën, por këshilltarët e PS-së atëherë nuk e fusnin në rend dite. Opozita do të votojë shkarkimin siç ka kërkuar më 12 maj”, ka deklaruar deputeti i PD-së, Belind Këlliçi.

Nga ana tjetër i pyetur nëse opozita do të marrë pjesë në zgjedhjet e pjesshme për bashkitë, Këlliçi hodhi poshtë zërat që thonin se mund të bojkotohen zgjedhjet duke thënë që padiskutim opozita do të jetë në zgjedhje.

Pjesë nga biseda

Në Tiranë pritet të kemi zgjedhje të pjesshme, a do të marrë pjesë opozita?

Këlliçi: Padiskutim që po. Në momentin e parë që do të ketë zgjedhje, padiskutim do të marrim pjesë, ka figura të spikatura dhe potencial. Unë nuk mund ta imagjinoj në asnjë skenar një bojkot të zgjedhjeve.

Bushati: Pse?

Këlliçi: E kemi parë produktin e bojkotin.

Bushati: Po produktin e Himarës e pe?

Këlliçi: Çështja e bojkotit as nuk diskutohet.

Kujtojmë se Erion Veliaj u shkarkua politikisht nga kryeministri Edi Rama në 11 shtator në mbledhjen e Asamblesë së PS-së.

Pas shkarkimit të tij politik, Rama kandidoi Ogerta Manastirliun për kryetare bashkie.

Tashmë pritet që Këshilli Bashkiak të përfundojë procedurat për shkarkimin e tij./ CNA