“35 vite me fytyrën e ngrysur”/ Rama: Gramoz Ruçi është kryepatronazhisti i PS-së

2 Qershor 2026, 22:04, Politikë CNA

“35 vite me fytyrën e ngrysur”/ Rama: Gramoz Ruçi

Kryeministri Edi Rama gjatë ceremonisë së 35-vjetorit të PS-së në Tiranë vlerësoi kontributin e figurave historike të partisë, duke ndalur veçanërisht te roli i Gramoz Ruçit, një prej figurave historike të kësaj partie.

Rama tha se Gramoz Ruçi ka kaluar 35 vite në politikë pa përdorur rrjetet sociale, pa dërguar mesazhe telefonike dhe me shumë pak dalje mediatike, ndërsa shtoi se telefoni i tij përdoret kryesisht për të marrë mesazhe dhe për t’iu përgjigjur njerëzve përmes telefonatave direkte.

Sipas Ramës, forca e Ruçit qëndron te marrëdhënia e vazhdueshme me qytetarët dhe socialistët në të gjithë vendin.

Rama e cilësoi Ruçin si kryepatronazhistin e PS-së.

“Gramozi është kryepatronazhisti i PS”, deklaroi Rama, duke e cilësuar atë si figurën që mishëron më së miri organizimin dhe komunikimin e drejtpërdrejtë me anëtarësinë e partisë.

“Nuk dua t’ju mbaj gjatë. E hoqa fjalimin, e hoqa foltoren. Jam këtu për të thënë disa fjalë. Dua ta nis me frymëzimin që më dha dalja e Gramozit (Ruçit) këtu, që më kujtoi një fjalë të legjendarit Fate Velaj, i cili kur u bë deputet i PS, pas ca kohësh tha: ‘Çfarë misteri është me këtë njeri? 35 vite në maj, 35 vite me fytyrën e ngrysur’.

I thashë unë: ‘Si e shpjegon ti?’ ‘Duhet të jetë profesion më vete, se ne nuk na ndjek njeri nga mbrapa siç ndjekin këtë.

Unë dua të shtoj më shumë, sepse nuk është vetëm i ngrysur. 35 vjet, Facebook jo, Instagram jo, TikTok jo e jo. Qëkur ka dalë telefoni celular, akoma s’ka bërë një SMS tani që flasim. I punon telefoni vetëm në marrjen e SMS-ve. Plus kësaj, 35 vite, intervista në media ka dhënë 3 vite e gjysmë.

Kjo e ka shpjegimin te telefoni, se askush nga ne nuk ka të gjitha kontaktet që ka Gramozi, nga veriu në jug, nga ditët para themelimit, pas themelimit, gjatë themelimit.

Asnjë nuk e arrin dot atë që Gramozi ka bërë dhe vazhdon të bëjë edhe sot, që jo vetëm i përgjigjet çdo njeriu, jo me SMS, është kuadër i vjetër, mos lër gjurmë, por me telefon një për një, ata shkruajnë, ai përgjigjet.

Po të mbledhësh rrugët e Gramozit për vaki, për ngushëllime e për dasma, e për pagëzime, janë të panumërta.

Pra, ajo që Fate Velaj nuk e kuptonte dot dhe shumëkush që nuk e kuptojnë si funksionon Gramozi, është fakti që Gramozi është kryepatronazhisti i PS.

E kam thënë përpara dhe e përsëris sot, unë çmoj punën e të gjithëve, por mbi të gjitha çmoj punën e patronazhistëve”, tha Rama./ CNA