E fundit!

11:59 Aktualitet

Mosfillimi i hetimeve për punonjësit e paraburgimit/ Ish-presidenti i drejtohet Gjykatës së Tiranës

Ish-presidenti Ilir Meta i është drejtuar Gjykatës së Tira...

Kur injoranca prodhon ligësi!/ Mos i mallkoni “katundarët” për çmimin e qershisë!

4 Maj 2025, 09:09, Opinione Mentor Kikia

Kur injoranca prodhon ligësi!/ Mos i mallkoni “katundarët”

Hasa në një postim sot në mëngjes. Një arkë me qershi dhe çmimi 4000/ kg. Që do të thotë 40.000 me llogaritë tona alla shqiptare.

Lexova me nge, meqë e kisha kohën me tepri këtë mëngjes, thuajse të gjithë komentet e njerëzve në këtë postim.

-Mos u ngopshin!

-Mos i hëngshin

-Katunarët tanë janë katila, më mirë i kalbin aty sesa t’i shesin lirë prodhimet e tyre.

-Kështu është kur s’ka as shtet as qeveri

-Plehrat

-Maskarenjtë….

Kjo ishte përmbajtja thuajse e të gjitha komenteve.

Më dhembi më shumë mallkimi ndaj “katundarit tonë gjakpirës”.

O njerëz, atij katundarit - etiketim ofendues edhe ky - duhet t’i puthni duart, sepse ti ngrihesh në mëngjes, në orën 8, e hap fb për ta mallkuar, ndrësa ai është zgjuar që në 5 dhe ka dalë të punojë.

Prodhimin, domatet e kastravecat, lakrën e sallatën, atij ia blejnë për 20 qindraka tregtarët dhe ua shesin/na i shesin 10 fish më shtrenjtë ne të tjerëve.

Dalim tek qershitë…..

Qershitë jo 40,000 por do të shkojnë edhe 100.000 Lek/kg. Sepse ka 3-4 vjet, që si pasoje e ndryshimit të klimës, pemët çelin, një pjesë, që në shkurt sepse është shumë ngrohtë. Ato ose nuk lidhin frut, ose dëmtohen nga i ftohti që rikthehet befas në mars. Një pjesë tjetër çelin në mes të prillit, pasi kanë ikur edhe “Plakat”, por ndërkohë u ka kaluar cikli biologjik dhe lulet nuk bëhen sërish fruta. Në zona të caktuara, ende pemët ia dalin të prodhojnë, por ka shumë kak prodhim ndaj çmimi është sikur të vinte nga Japonia.

Kjo ka prekur edhe kajsitë dhe në shumë zona edhe pjeshkët. Por këto nuk i ndjeni fort, sepse vërshon prodhimi i importit, ku pemët po futen në sera apo koha nuk ka këtë impakt të madh.

Është çmendur koha zotërinj dhe ai “katundari” po e vuan i pari dhe më shumë këtë çmenduri. Ai i shërben pemëve një vit të tërë dhe kur vjen koha t’i marrë prodhimin, ajo dështon.

Sepse këtu nuk ka asnjë përpjekje për të punuar në kërkim shkencor, për të prodhuar varietete pemësh e bimësh që i përshtaten kushteve të reja të klimës, siç po përpiqet njerëzimi kudo t’i mbijetojë klimës së re.

Deri atëherë, ose hani çfarë do të gjeni, nëse ua mban xhepi, ose heshtni e mos mallkoni njerëzit me duar të rreshkura.

Me këto ritme, nuk do jetë e largët koha kur qershia të shpallet bimë e rrallë dhe ruhet vetëm në kopshte botanike, apo ti bëjmë kokrrat prej plastike, që t’i varim tek bufeja./ CNA