E fundit!

17:40 Aktualitet

"E ka fituar dhe një prej kumbarëve të qeverisë në takimin e Arubës"/ Këlliçi: Të anulohet procedura për Milot–Balldren

Nënkryetari i Partisë Demokratike, Belind Këlliçi është sh...

Margarita Xhepa, një nga Zonjat e Mëdha të teatrit dhe filmit shqiptar

3 Prill 2025, 08:42, Kulturë CNA

Margarita Xhepa, një nga Zonjat e Mëdha të teatrit dhe filmit

Margarita Xhepa, ylli i kinematografisë shqiptare, është ndarë nga jeta në moshën 91-vjeçare.

Margarita Xhepa është një nga Zonjat e Mëdha të teatrit dhe filmit shqiptar që ka skalitur memorien e publikut shqiptar me role brilante që prej fillimit të saj në vitet '60 dhe deri më tani.

Në maj të vitit 2004, u rikthye në skenën e Teatrit Kombëtar për të shkëlqyer në dramën "Streha e të harruarve", një tjetër sukses në karrierën e saj 50-vjecare.

Nga viti 1950 u aktivizua si artiste në Teatrin Popullor, sot Teatri Kombëtar, dhe njëkohësisht studioi në Liceun Artistik, dega e Dramës.

Ka luajtur mbi 150 role në teatër, midis të cilëve mund të përmendim: Majlindën te filmi "Majlinda", Dafina te “Lumi i vdekur”, Filja te “Cuca e maleve”, zonja Mëmë te “Kush e solli Doruntinën”, Nëna te “Përballë vetes” etj.

Ka qenë njësoj e suksesshme në rolet e dramaturgjisë botërore, si Ofelia te “Hamleti”, vajza e dytë te “Mbreti Lir”, dado te “Romeo e Xhulieta”, Mbretëresha Margaret te “Rikardi III”, të Shekspirit.

Në rolet e tjera nga dramaturgjia botërore spikasin Klea te “Dhelpra dhe rrushtë” (Figereido), Lena te “Xhaxha Vanja” (Çehov), Ledi Milford te “Luiza Miler” (Shiler), zonja Berling te “Vizita e inspektorit” (Pristli), zonja Lomen te “Vdekja e një komisioneri” (A. Miller), Ana Andrejevna te “Revizori” (Gogol), Marsela te “Qeni i kopshtarit” (De Vega), Mashenka te “Mashenka” (Afigenov), Shejla te “Morali i zonjës Dulska” (Zapolska), apo dado tek “Elektra e Sofokliut”, nën drejtimin e regjisorit grek Dhimitri Mavriqis, në Teatrin Kombëtar të Greqisë në Athinë.

Veç roleve në teatër, ka realizuar edhe 32 role në kinematografi, duke punuar me shumicën e regjisorëve shqiptarë.

Në vitin 1997, interpretoi në filmin grek "Mirupafshim" (regjisor J. Koras, K. Vupuras). Filmi u nderua me Çmimin e Madh në Festivalin Ndërkombëtar të Filmit Mesdhetar në Selanik, ndërsa Margarita Xhepa, me Çmimin e Nderit./ CNA