E fundit!

10:35 Live Updates

Hijet e Erion Veliajt në protestë

Veliaj përmes Arta Dades refuzon “antimiti...

Vrasja e 33-vjeçarit/ Ngujohet familja Hasaj: Jemi 7 anëtarë, kemi mbetur pa bukë

15 Janar 2025, 13:24, Kronika CNA

Vrasja e 33-vjeçarit/ Ngujohet familja Hasaj: Jemi 7 anëtarë,

Kryetari i shoqatës së misionarëve të paqes dhe pajtimit të Shqipërisë, Dedë Shullani, pas ngjarjes së rëndë të ndodhur në Postribë, ku u vra 33-vjeçari R.M., ishte i pranishëm në familjen Hasaj.

Kryefamiljari i Rustem Hasajt, i penduar, tregon gjendjen e tij të rënduar emocionale dhe ekonomike.

“Jemi 7 anëtarë në familje pa bukë, pa shtëpi! Shteti të na ndihmojë. S’kam pasur asnjë dijeni për konfliktin, as mosmarrëveshje. Jam babai i dy djemve të arrestuar. Kjo fatkeqësi na ka ndodhur të dyja palëve. Unë i kam kërkuar ndjesë familjes së viktimës dhe gjithë fshatit.

Kam nevojë për ndihmën e shtetit dhe të individit se jena në kushte të vështira. Jemi 7 veta në familje, përfshirë 4 fëmijët e djalit që është në burg. Jemi për mbijetesë. S’kemi asnjë të ardhur. S’kam as pension, as asistencë, asgjë. Unë jam në ngujim, jam në gjendje të mjerueshme nga ana e ekonomisë.

I lutem drejtësisë, popullit, kujtdo të na ndihmojë, mos i raftë kujt kjo punë. Unë përpara kam punuar me makinë, taksi pa licencë, çoja bashkëfshatarët në destinacionet e tyre. Edhe djemtë kanë punuar sa për të jetuar, por ata ranë në burg. Tani jena pa asnjë të ardhur me 7 veta në familje".

Hasaj tregon se me babain e viktimës kanë qenë në një klasë për 8 vite dhe ngjarja e ka shokuar. Apeli shkon për ndihmë pasi kushtet në të cilat jetojnë janë shumë të vështira.

Kryetari i shoqatës së misionarëve të paqes dhe pajtimit të Shqipërisë, Dedë Shullani, thotë se po punohet që të rifillojë komunikimin mes familjeve.

“Qëllimi ynë ishte të komunikonim me familjet që u ka ndodhur fatkeqësia dhe rreziku. Falënderoj shtetin fillimisht që në një kohë rekord ka arritur që të zbulojë krimin dhe ka çuar autorët përpara përgjegjësisë.

Pas një jave ne si shoqatë e pajtimit të gjaqeve dolëm dhe komunikuam me familjen që i ka ndodhur problemi dhe fatkeqësia me qëllim që mes këtyre dy familjeve me kalimin e kohës të arrijmë që të jetojnë në paqe.

Familja ku ishim ne ishte në një gjendje katastrofike, me probleme ekonomike, pa shtëpi mbi kokë dhe pa asgjë në botë. Ne intervistuam babain e autorit dhe sipas asaj që tha deklaroi se ai nuk ka qenë aspak në dijeni për ngjarjen që kanë kryer djemtë e tij. Ishte i përulur, ishte i mërzitur dhe nuk di çfarë të them, por një familje në një gjendje shumë të lodhur ekonomike.

Ne si misionarë deri në fund nuk do t’u ndahemi vizitave në këto familje derisa të gjejmë një rrugë komunikimi për të mirën e dy palëve. Isha edhe me dy misionarë të tjerë, Adem Isufi një burrë me shumë mend dhe që i ka dhënë shumë shoqatës së pajtimit të gjaqeve.

Isha edhe me Bib Noshin, bajraktar i Nikaj Mërtur, edhe ai një aktivist, ndërsa edhe vëllai i tij ka kontribuar për 25 vite. Gjakmarrja është një fenomen shqetësues, por shoqata jonë ka bërë shumë për pajtimin e gjaqeve.

E dimë që ky fenomen do të vazhdojë për sa kohë do të vijojë njerëzimi dhe ne si shoqatë do të mundohemi me të gjitha kapacitetet që të bëjmë më të mirën dhe kushdo që ka nevojë për ne do t’i përgjigjemi për të mirën e kombit, komunitetit dhe familjeve”.

Fenomeni i gjakmarrjes vijon të jetë shqetësues për të gjithë veriun e vendit./ CNA