web counter
LEXO PA REKLAMA!

SHKARKO APP

App Store
Google Play

Si nisi rivaliteti mes “Klanit Duka” dhe Ervis Martinajt/ Hakmarrja e “Princit Damian”

18 Maj 2024, 18:12, Kronika CNA

Në kuadër të operacionit të SPAK, një ndër më të mëdhenjtë të zhvilluar ndonjëherë ndaj krimit të organizuar, është bërë i mundur arrestimi i Leonard Dukës në Belgjikë.

Duka, i cili njihet si kreu i “Klanit Duka” ka bërë kërkesë azil në Belgjikë, por pritet që ajo të refuzohet dhe të ekstradohet në vendin tonë. Për shkak të jetës së luksit, miqtë e thërrasin “Princi Damian”.

Grupi i tij kriminal që ka pasur një konflikt të vazhdueshëm me grupin e Ervis Martinajt, bossin e lojërave të fatit. Ata kishin një rivalitet në tregun e lojërave të fatit, pasi Leonard dhe Erlis Duka e kishin shtrirë aktivitetin e tyre të paligjshëm në zonën veri-lindore të Tiranës.

Si nisi hasmëria dhe saga e vrasjeve?

E gjitha nisi nga Ervis Martinaj. Ky i fundit mori peng dhe dhunoi fizikisht babanë e vëllezërve Duka për shkak të rivalitetit në lojërat e fatit. Dy vëllezërit u betuan për hakmarrje deri në eliminimin e ushtarit të fundit të Martinajt.

Fillimisht, ata ekzekutuan ish-policin Santiago Malko në rrugën “Xhanfize Keko” në gusht të vitit 2019 në Tiranë, duke qenë se ai ishte një nga personat më të afërt të bossit të lojërave të fatit. Sipas SPAK-ut, Malko u ekzekutua nga vlonjati Fatmir Hyseni, i njohur si “Doqja” dhe për këtë arsye Martinaj planifikoi më vonë eliminimin e tij.

Vrasja e dytë ndodhi më 30 maj 2020 brenda një hoteli, në aksin Mamurras-Lezhë. Viktima mbetën biznesmeni Bujar Lika dhe Paulin Gjergji, dy miqtë të Martinajt.

Atentati i tretë ndodhi në 13 nëntor 2021, në zonën e Unazës së Re në Tiranë, ku u qëlluan me breshëri brenda makinës Erigers Mihasi dhe Armand Dumani.

Rreth një muaj më vonë, më 23 dhjetor 2021 u ekzekutua brenda makinës një tjetër ushtar i Martinajt. Bëhet fjalë për Can Karriqin, i cili u vra në Kamëz.

Një tjetër atentat ishte ai te mbikalimi i Fushë-Krujës në 17 korrik të vitit 2022. Në këtë raste u vranë Diklen Vata, Besmir Hoxha dhe Brilant Martinaj

Rasti më i fundit ka qenë atentati ndaj financierit të Martinajt, Ylli Brahimit. Mbrëmjen e 22 korrikut 2022, pikërisht në hyrjen kryesore të banesës së Ylli Brahimit apo Brahjas siç njihet ndryshe, pati breshëri armësh, por ai shpëtoi dhe viktimë mbeti Klisman Preçi.

Pak javë më vonë u denoncua edhe zhdukja e Ervis Martinajt. Që prej 9 gushtit të vitit 2022 nuk dihet asgjë për fatin e tij.

Dyshimet për këto krime ranë mbi Klanin Duka, por Martinaj kishte hasmëri edhe me grupe të tjera kriminale./ CNA





Lajmet e fundit nga