web counter
LEXO PA REKLAMA!

SHKARKO APP

App Store
Google Play

Operacion për kapjen e një personi në kërkim/ “Kërcet” arma në Shkodër

9 Mars 2026, 16:06, Kronika CNA

Të shtëna me armë zjarri janë raportuar në lagjen "Guerrile" në Shkodër, gjatë një operacioni policor për kapjen e një personi të shpallur në kërkim dhe të konsideruar me rrezikshmëri të lartë.

Sipas informacioneve paraprake, në momentin kur efektivët e policisë ndodheshin në ndjekje dhe në një perimetër të afërt me të dyshuarin, një shtetas ka qëlluar në ajër me armë zjarri dhe më pas është larguar në drejtim të paditur.

Burime nga policia bëjnë me dije se dyshohet se bëhet fjalë për shtetasin B.B., i cili rezulton në kërkim edhe për disa vepra të tjera penale.

Menjëherë pas ngjarjes, në zonë kanë mbërritur dhjetëra forca policie, të cilat kanë rrethuar lagjen dhe kanë ngritur pika kontrolli. Operacioni vijon ende, ndërsa zona është blinduar nga efektivët me qëllim kapjen e personit të dyshuar.

"Rreth orës 15:10, gjatë patrullimit në lagjen “Guerrile”, shërbimet e Policisë i kanë bërë shenjë ndalimi, një automjeti me të cilin lëviznin 2 shtetas, me qëllim kryerjen e kontrolleve. Drejtuesi i automjetit nuk i është bindur urdhrit të punonjësve të Policisë, por ka shtuar shpejtësinë e lëvizjes dhe ka kryer manovra të rrezikshme me automjet.

Për këto arsye, shërbimet e Policisë i janë vënë në ndjekje automjetit. Gjatë ndjekjes, dyshohet se pasagjeri në këtë automjet, duke u larguar ka qëlluar një herë, në ajër, me armë zjarri, dhe është larguar.

Shërbimet e Policisë kanë kapur drejtuesin e automjetit, inicialet e të cilit nuk bëhen të ditura për momentin, për shkak të konfidencialitetit të hetimit.

Ndërkaq, vijon intensivisht puna për lokalizimin dhe kapjen e pasagjerit në këtë automjet.

Grupi hetimor, në drejtimin e Prokurorisë, po punon për të zbardhur rrethanat e rastit", thuhet në njoftim./ CNA





Lajmet e fundit nga