LEXO PA REKLAMA!

SHKARKO APP

E fundit!

x

“Mbesën s’kishte ku ta linte, e mbante me vete”/ Fevziu reagon ashpër për vrasjen në “Don Bosko”

13 Mars 2023, 20:03, Kronika CNA

“Mbesën s’kishte ku ta linte, e mbante me vete”/ Fevziu

Gazetari Blendi Fevziu ka reaguar për atentatin e mbrëmjes së kaluar në “Don Bosko” ku u vra banakierja e një lokali dhe u plagosën 5 të tjerë, mes tyre edhe mbesa e mitur e viktimës.

Me anë të një statusi në rrjetet sociale, Fevziu thotë se nuk i është hequr nga mendja imazhi i gjyshes së vuajtur që punonte dhe e merrte mbesën me vete pasi nuk kishte ku ta linte.

Ai deklaron se autorët kriminelë nuk e mbajtën dorën as ndaj 10-vjeçares, prindërit e së cilës ishin divorcuar.

Gazetari thekson se viktima Mimoza Paja nuk e dinte dhe as nuk do ta marrë vesh kurrë arsyen e konfliktit të banditëve që i morën jetën.

“Nuk e hiqja dot nga mendja imazhin e kësaj gruaje të vuajtur gjatë ditës sot. Mendoja se si priste të mbaronte turnin, me mbesën ulur pranë. Mbesën që nuk kishte ku ta linte, ndaj e mbante pranë vetes, duke bërë edhe detyrat e shkollës aty. Priste të mblidhej bashkë me të dhe të ishin pak momente të qeta. Jeta nuk ishte treguar bujare me asnjërën prej tyre.

Gjyshja e mbetur jetime dhe mbesa me prindër të divorcuar, i kishin lidhur fatet bashkë. Në varfërinë, por edhe në përpjekjen për të mbijetuar. Mimoza Paja kishte punuar gjithë jetën, e mbetur jetime që në fëmijëri. Mbesa e saj 10 vjeçe mbeti vetëm kur prindërit u divorcuan. Ajo rrinte aty, pranë gjyshes, duke e ndihmuar nga pak e duke u përpjekur t’ja reduktonte lodhjen e ditës.

Gjyshja kishte pak ditë që kishte gjetur punë dhe ato me siguri kanë qenë të gëzuara për këtë. Por fati që i lidhi bashkë edhe i ndau dje në mbrëmje. Gjyshja po punonte dhe vajza e vogël ishte ulur aty pranë kur një grup kriminelësh derdhi ndaj lokalit breshëritë e frikshme te kallashnikovit. Gjyshja vdiq në vend; mbesa u plagos.

Gruaja qe e vetmja viktimë e një konflikti, që as e dinte, as e njihte dhe që as do ta marrë vesh kurrë. Një konflikti banditësh e kriminelësh qe nuk e mbajnë dorën as ndaj një fëmije 10 vjeçare. Iku duke lënë në këtë botë kujtimin e një gruaje që nuk pa një ditë të bardhë dhe një mbese që sot ka mbetur edhe më e vetme në këtë botë kaq të padrejtë. U prehsh në paqe Mimoza Paja”, shkruan Fevziu./ CNA.al

Lajmet e fundit nga