web counter
LEXO PA REKLAMA!

SHKARKO APP

App Store
Google Play

E fundit!

x

Zbardhet vrasja e shqiptarit në Itali/ Arrestohet fqinji, u "tradhtua" nga pakot e Amazon

16 Dhjetor 2025, 08:35, Kosova & Bota CNA

Zbardhet vrasja e shqiptarit në Itali/ Arrestohet fqinji, u

Pas gati gjashtë muajsh hetimesh, ka ardhur kthesa në vrasjen e Fatos Cenajt, 58-vjeçarit shqiptar të vrarë me një plumb në kokë më 8 qershor 2025. Trupi i burrit, ish-roje burgu, ishte gjetur në një rrugicë fshati në Fontanaviva, në provincën e Padovës, vetëm disa qindra metra larg banesës ku jetonte me familjen. Të shtunën, më 13 dhjetor, karabinierët arrestuan fqinjin e viktimës, një punëtor 45-vjeçar, Moreno Violetto, i cili tashmë akuzohet për vrasje të rënduar.

 

Pamjet e kamerave

Ushtarakët e Padovës, së bashku me kolegët e Cittadella-s dhe RIS-in e Parmës, arritën të identifikojnë autorin e dyshuar duke analizuar pamjet e atij mëngjesi, kur Cenaj, duke u drejtuar për në manejin ku punonte, u kryqëzua vetëm me një çiklist me biçikletë malore, i veshur nga koka te këmbët, pavarësisht klimës verore. Ai mbante helmetë, syze të errëta, një maskë–respirator të çuditshme dhe i kishte të dy krahët të mbuluar me “tatuazhe”, të cilat nga një analizë më e thelluar rezultuan të ishin mëngë artificiale me tatuazhe false.

 

Blerjet në Amazon

Duke ndjekur gjurmët e maskës respiratore dhe të mëngëve me tatuazhe, karabinierët e Njësisë Hetimore dhe RIS zbuluan se në muajt pararendës këto ishin blerë në Amazon pikërisht nga fqinji i Cenajt. 45-vjeçari kishte blerë gjithashtu bojë për të ndryshuar ngjyrën e biçikletës së tij malore dhe materiale të tjera për të prodhuar në shtëpi armë zjarri dhe municione. Një pjesë e këtij materiali iu gjet gjatë një kontrolli të kryer që në korrik, kur iu sekuestrua biçikleta: në kapanonin pas shtëpisë së tij u gjetën edhe disa maja plumbash të prodhuara artizanalë, të cilat burri i kishte qëlluar për prova.

 

Zënkat me fqinjin

Siç shpjegohet edhe nga kolegët e PadovaOggi, RIS konstatuan gjithashtu përputhshmëri midis mbetjeve të qitjes që kishin goditur pensionistin shqiptar dhe gjurmëve të gjetura në biçikletën e fqinjit. Cenaj në Shqipëri kishte shërbyer në policinë penitenciare, përpara se t’i bashkohej familjes që ishte transferuar në Itali prej disa vitesh dhe kishte blerë një banesë në Fontaniva. Asnjë njollë në të kaluarën e tij, përveç marrëdhënieve të vështira fqinjësore me familjen përballë, të cilat deri atëherë kishin mbetur të kufizuara në çështje banale. Më pas erdhi krimi, hetimet dhe arrestimi i 45-vjeçarit nga Padova, tashmë i burgosur në burgun “Due Palazzi” me akuzën e vrasjes së rënduar.





Lajmet e fundit nga