E fundit!

19:55 Aktualitet

“Protestat e kanë goditur qeverinë”/ Kikia: Ministrat dhe deputetët nuk ecin të lirë në rrugë

Gazetari dhe analisti Mentor Kikia ka folur ditën e sotme ...

Si e rrëzua nga posti Suella Braverman, u shpalli luftë shqiptarëve dhe doli kundër palestinezëve

13 Nëntor 2023, 10:42, Kosova & Bota CNA

Suella Braverman

Të hënën, kryeministri i Britanisë së Madhe, Rishi Sunak, ka marrë vendimin për të shkarkuar nga detyra Sekretaren e Brendshme të Mbretërisë së Bashkuar, Suella Braverman. Mediat vendase raportojnë se ajo është shkarkuar pasi ka kritikuar protestat pro-Palestinës, ku përdori edhe fjalën terroristë.

Por, nuk është hera e parë që Suella Braverman bën deklarata të forta kundër kombeve. Vitet e fundit ajo u shpalli luftë edhe shqiptarëve që tentonin të hynin ilegalisht në Britani të Madhe nga kanali i La Manche.

Në deklaratat e saj, vajza e dy emigrantëve nga Kenya, theksoi disa herë se shqiptarët janë gënjeshtarë, kriminelë dhe se duhet të merreshin masa të menjëhershme që ata të mos lejoheshin të futeshin në territorin anglez.

"Shqiptarët gënjejnë për arsyen përse largohen nga vendi dhe shumë prej tyre janë persona me rekorde kriminale" – u shpreh Braverman në një deklaratë që ngjalli reagime të shumta të komunitetit shqiptar në Angli, por edhe të politikës shqiptare.

“Asnjë shqiptar i vetëm nuk duhet të pranohet si refugjat. Shqipëria nuk është një vend i shkatërruar nga lufta dhe është shumë e vështirë të argumentohet se kërkesat për azil janë legjitime. Ekziston një problem i veçantë me burrat shqiptarë që kalojnë kanalin ilegalisht ose për të gjetur punë për rreth nëntë muaj ose për të punuar me kriminelë që kërkohen ndërkombëtarisht”.- tha Baverman në Parlament në 31 tetor të 2022-shit.

Pas kësaj deklarate Kryeministri Edi Rama bëri një reagim të gjatë në rrjetet e tij sociale ku saktësonte se një pjesë e mirë e shqiptarëve që punojnë e jetojnë në Londër janë qytetarë që kontribuojnë në ekonomi e që më herët kanë jetuar e zbatuar rregullat e ligjet e vendeve të BE-së si Itali, Greqi, etj.

“Vënia në shënjestër e shqiptarëve (siç bënë disa me turp kur luftuan për Brexit) si shkaku i krimit të Britanisë dhe problemeve kufitare e bën retorikën e lehtë, por injoron faktet e vështira. Të përsërisësh të njëjtat gjëra dhe të presësh rezultate të ndryshme është çmenduri (pyesni Ajnshtajnin!)

70% e 140,000 shqiptarëve që janë shpërngulur në MB jetonin në Itali dhe Greqi. 1200 prej tyre janë njerëz të biznesit. Shqiptarët në Britaninë e Madhe punojnë shumë dhe paguajnë taksa. Britania e Madhe duhet të luftojë bandat e krimit të të gjitha kombësive dhe të ndalojë diskriminimin e shqiptarëve për të justifikuar dështimet e politikave. “ – shkruante ndër të tjera Rama.

Pas reagimeve të opinionit publik ishte ministri i Brendshëm i asaj kohe, Bledi Çuçi, i cili në një takim me Braverman i kërkoi kësaj të fundit që të amnistoheshin dhe të pajiseshin me dokumentacionin e rregullt shqiptarët që nuk kanë asnjë rekord kriminal.

Megjithatë as kjo nuk e ndali sekretaren që të vijonte akuzat ndaj shqiptarëve me gjuhë raciste madje duke akuzuar edhe avokatët se po krijonin aplikime të rreme me qëllim pajisjen me dokumente të emigrantëve ilegalë në Angli.

“Duhet të marrë fund abuzimi prej këtyre avokatëve me sistemin tonë të azil kërkimit dhe të mashtruarit e vendit tonë me aplikime të sajuara azili. Avokatët mashtrues duhet të ndalohen dhe të vihen përpara drejtësisë. E ndërsa shumica e avokatëve veprojnë ndershmërisht ka disa prej tyre të cilët dërgojnë aplikime azili të mbushura me gënjeshtra duke ndihmuar emigrantët që mbërrinë ilegalisht.” -tha Btaverman.

Një sërë protestash u mbajtën nga komuniteti shqiptar në Londër nën thirrjet: “Nuk jemi kriminelë” dhe “Qeveria britanike të na kërkojë falje”.

Shqiptarët që jetojnë e punojnë në Londër kërkuan që ndaj tyre të mos përdoren cilësime fyese, por të respektohen njësoj si gjithë komunitetet e tjera të cilat jetojnë në Britaninë e Madhe./CNA