LEXO PA REKLAMA!

SHKARKO APP

Opozita në Kosovë i kërkon Kurtit më shumë transparencë për dialogun

24 Nëntor 2022, 14:23, Kosova & Bota CNA

Opozita në Kosovë i kërkon Kurtit më shumë

Partitë opozitare në Kosovë kanë mirëpritur arritjen e marrëveshjes me Serbinë për targat ilegale serbe.

Veç kësaj, në seancën parlamentare të Kuvendit të Kosovës, deputetët opozitarë kërkuan nga kryeministri Albin Kurti më shumë sqarime rreth marrëveshjes së arritur, si dhe dialogut rreth marrëveshjes finale.

Kosova dhe Serbia, më 23 nëntor në Bruksel, kanë arritur marrëveshje për targat ilegale serbe.

Kosova është pajtuar të mos vazhdojë tutje me zbatimin e vendimit për riregjistrimin e automjeteve me targa ilegale serbe në RKS, kurse Serbia që të mos lëshojë targa të reja serbe, sikurse ato KM (Kosovska Mitrovica - Mitrovica e Kosovës).

Kryetari i Partisë Demokratike të Kosovës(PDK), Memli Krasniqi, tha se mirëpret dakordimin që është arritur të mërkurën në Bruksel, që sipas tij, shmang përshkallëzimin dhe eskalimin potencial të situatës në veriun e vendit.

Armend Zemaj, deputet i Lidhjes Demokratike të Kosovës(LDK), tha se ngjarjet që ndodhë së fundi lidhur me targat, kanë qenë të panevojshme dhe të dëmshme për shtetin e Kosovës.

“Kthimi dhe pranimi i marrëveshjes së njëjtë tregon qasjen joserioze dhe paaftësinë tuaj [Albin Kurtit] përballë përgjegjësive shtetërore që keni me vendin dhe Kosovën".

“Domosdo, duhet transparencë për dialogun para Kuvendit, qytetarëve të Kosovës dhe jo deklarata kontradiktore, jo qasje selektive, jo injorim ndaj neve dhe qytetarëve dhe ndaj partnerëve strategjikë, mbi të gjitha Shteteve të Bashkuara”, tha ai.

Edhe, kryetari i Aleancës për Ardhmërinë e Kosovës(AAK), Ramush Haradinaj, tha se e mirëpret marrëveshjen, e cila, sipas tij, shmangu rrezikun për përshkallëzim të situatës në veri.

Megjithatë, ai theksoi se me marrëveshjen nuk është zgjidhur situata në veri.

“Sfida që e pret Kosovën është rikthimi i atyre që i kanë lëshuar vendet e punës apo plotësimi i pozitave”, tha Haradinaj.

Arritjen e marrëveshjes për targat ilegale serbe e ka mirëpritur edhe SHBA-ja.

Kreu i PDK-së, Memli Krasniqi, i tha Kurtit se nga marrëveshja e arritur për targat ka një paqartësi, nëse pritet kthimi i serbëve në institucionet e Kosovës.

Kryeministri tha se kthimi i tyre në institucione nuk mund të bëhet politikisht dhe se kjo është çështje juridiko-ligjore e kushtetuese.

“Unë iu kam bërë thirrje të gjithë serbëve që janë në institucione: mos i braktisni ato, mos jepni dorëheqje. Por, nuk iu kam thënë kthehuni. Nuk kam të drejtë t’iu them kthehuni. Shkuarja e tyre është akt individual, kthimi i tyre është çështje ligjore, kushtetuese, institucionale”, tha Kurti.

Në fillim të nëntorit, si pasojë e tensioneve të ngritura, serbët e veriut të Kosovës - ku qarkullojnë kryesisht makinat me targa të paligjshme - kanë dhënë dorëheqje nga institucionet e Kosovës.

Kthimin e tyre në institucione e kanë kërkuar edhe partnerët ndërkombëtarë.

Presidentit i Serbisë, Aleksandar Vuçiç, ka thënë më 24 nëntor se përfaqësuesit serbë janë të gatshëm të kthehen në institucionet e Kosovës, pasi të formohet Asociacioni i komunave me shumicë serbe.

Për formimin e Asociacionit është rënë dakord me Marrëveshjen e Brukselit të vitit 2013 ndërmjet Beogradit dhe Prishtinës, por kryeministri aktual i Kosovës, Albin Kurti, beson se komunat nuk mund të organizohen sipas parimeve etnike.

Pas arritjes së marrëveshjes për targa, BE-ja tha se “palët e kuptojnë se të gjitha marrëveshjet e kaluara të arritura në bisedime duhet të zbatohen”, si dhe “çështjet dhe parimet kryesore që lidhen me normalizimin do të trajtohen në kontekstin e propozimit (të Brukselit)”, një nismë e cila u bë e njohur si propozimi franko-gjerman, i mbështetur nga Shtetet e Bashkuara./REL

Lajmet e fundit nga