E fundit!

19:19 Kosova & Bota

I nxehti ekstrem në Greqi/ Qeveria urdhëron pezullim të detyrueshëm të punës për 4 orë në disa sektorë

Greqia ka ndërmarrë disa masa emergjente për mbrojtjen e p...

Ngrihet aktakuzë për vrasjen e Liridona Ademajt

15 Janar 2025, 10:43, Kosova & Bota CNA

Prokuroria Themelore në Prishtinë ka bërë të ditur se hetimet për rastin e vrasjes së Liridona Ademajt kanë përfunduar dhe tashmë është ngritur aktakuzë ndaj katër personave, pak më shumë se një vit pas vrasjes së 30-vjeçares.

Në mesin e të akuzuarve për vrasjen e saj është bashkëshorti i saj, Naim Murseli, me të cilin Liridona jetonte në Suedi dhe ka dy fëmijë. Tre të akuzuarit e tjerë janë Kushtrim Kokalla, Granit Plava dhe Tom Dodaj.

Prokurorja e rastit, Javorka Perlinçeviq, tha se nuk mund të japë shumë detaje rreth aktakuzës, por shtoi se, gjatë kohës që jetonin në Suedi, Liridona dhe Naimi kishin "marrëdhënie të trazuara martesore", si pasojë e të cilave erdhën edhe problemet pronësore".

"Arsyet e tjera që kishte Naimi për të planifikuar dhe kryer këtë vrasje mund t'i mësoni në gjykatë kur të fillojë seanca kryesore", tha Perlinçeviq, e cila tha se gjetja e motivit kishte bërë që procesi i ngritjes së aktakuzës të merrte më shumë kohë.

Ndërkohë, në konferencën e mbajtur për këtë rast, kryeprokurori i Prokurorisë Themelore në Prishtinë, Zejnullah Gashi, tha ky rast ka qenë jashtëzakonisht i ndjeshëm dhe se janë zhvilluar hetime në shumë dimensione.

"Kjo vepër penale është vepra penale e vrasjes së rëndë e kryer nga anëtari i familjes dhe e kryer në mënyrë dinake, andaj si e tillë presim nga Gjykata një dënim kapital", tha Gashi.

Liridona Ademaj është vrarë në moshën 30-vjeçare, më 29 nëntor të 2023-shit, në rrugën "Dalip Alshiqi" në Prishtinë.

Fillimisht, rasti ishte raportuar si “grabitje me pasoja të vrasjes”, por, dy ditë më vonë, më 1 dhjetor 2023, Policia e Kosovës njoftoi se lidhur me rastin ka arrestuar dy persona. Në mesin e tyre ishte edhe bashkëshorti i Liridonës, Naim Murseli.

Gjykata Themelore në Prishtinë ua ka vazhduar disa herë masën e paraburgimit tre të dyshuarve për vrasjen e saj, Naim Murselit, Kushtrim Kokallës dhe Granit Plavës - për herë të fundit më 27 dhjetor të vitit të kaluar.

Ndërsa, të dyshuarit të katërt në këtë rast, T.D., Gjykata Supreme ia kishte ndërprerë masën e paraburgimit, duke ia mundësuar të mbrohet në liri. Ai ishte arrestuar më 9 dhjetor, nën dyshimin se ia kishte shitur armën dorasit.

Edhe pse autoritetet e drejtësisë ende nuk e kanë bërë të ditur motivin e kësaj vrasjeje, ajo ka marrë vëmendje të madhe.

Familja e Liridonës kishte kërkuar rivarrosjen e trupit të saj pranë varrezave të prindërve të saj, ndërsa aktivistët për të drejtat e grave kanë kërkuar që Liridona të mos identifikohej më me mbiemrin e bashkëshortit, por me atë të familjes së saj, Ademaj.

Zemërim të madh kishte shkaktur edhe fakti që burri i saj kishte qenë pjesë e ceremonisë së varimit.

Rasti i vrasjes së 30-vjeçares, nënë e dy fëmijëve, është dënuar rëndë në Kosovë dhe liderët politikë të vendit kanë kërkuar drejtësi për rastin e saj.

Nga viti 2010 deri më tani në Kosovë janë vrarë rreth 60 gra./REL