web counter
LEXO PA REKLAMA!

SHKARKO APP

App Store
Google Play

E fundit!

x

Ndarja nga jeta e Eliot Engel/ Kurti: Mik i madh i kombit, një nga zërat e palëkundur në mbështetje të Kosovës

11 Prill 2026, 10:37, Kosova & Bota CNA

Ndarja nga jeta e Eliot Engel/ Kurti: Mik i madh i kombit, një nga

Kryeministri i Kosovës, Albin Kurti, ka reaguar për ndarjen nga jeta të kongresmenit amerikan Eliot Engel, duke e cilësuar atë si një mik të madh të kombit shqiptar dhe një mbështetës të palëkundur të Kosovës.

Kurti theksoi se Engel, për më shumë se tri dekada në Kongresin e Shteteve të Bashkuara, ka qenë një shërbyes i përkushtuar i qytetarëve amerikanë dhe një zë i fortë në mbrojtje të të drejtave të njeriut.

Sipas tij, në kohët më të vështira për shqiptarët, Engel nuk u tërhoq nga angazhimi i tij, por përkundrazi e mbështeti dhe e avokoi çështjen e Kosovës në institucionet më të larta amerikane.

Kurti e veçoi si një nga zërat e hershëm dhe të palëkundur në mbështetje të Kosovës në periudhën kur vendi kërkonte drejtësi dhe mbështetje ndërkombëtare.

“Dje mori rrugën e amshimit miku i madh i kombit tonë dhe kongresmeni i shquar Eliot Engel.

Për më shumë se tri dekada në Kongresin e Shteteve të Bashkuara, ai ishte një shërbyes i përkushtuar i qytetarëve amerikanë dhe një zë i fuqishëm për të drejtat e njeriut.

Në kohët më të vështira për shqiptarët, Engel nuk u kursye asnjëherë në angazhimin e tij, duke e ngritur dhe avokuar për mbrojtjen e çështjes sonë në institucionet më të larta amerikane.

Ai ishte ndër zërat e hershëm dhe të palëkundur në mbështetje të Kosovës, në ditët kur drejtësia për popullin tonë kërkonte guxim dhe vendosmëri.

Takimet me të ishin gjithmonë të mbushura me vëmendje dhe interes të sinqertë për të ardhmen e vendit tonë.

Liria dhe pavarësia e Kosovës janë sukses i sakrificës së popullit tonë dhe mbështetjes së aleatëve tanë perëndimorë, ku një vend të veçantë zë pikërisht kongresmeni Engel.

Ai përfaqësonte bindjen se liria dhe të drejtat e njeriut janë themel i çdo shoqërie demokratike. Mirënjohja jonë për kontributin e tij në kauzën tonë kombëtare do të mbetet e përhershme.

Ngushëllimet më të sinqerta familjes, miqve dhe dashamirëve të kongresmenit”, shkruan Kurti./ CNA





Lajmet e fundit nga