Mark Carney në Washington/ Sot takimi i dytë me Trump

7 Tetor 2025, 20:33, Kosova & Bota CNA

Kryeministri i Kanadasë, Mark Carney ka zhvilluar sot një takim me presidentin amerikan, Donald Trump në Shtëpinë e Bardhë. Kjo është e dyta herë në 5 muajt e fundit që ai takohet me Trump, teksa vijojnë tensionet mes 2 vendeve pas shpalljes së tarifave të reja të vendosura nga SHBA-të për çelikun, automjetet dhe të mira të tjera materiale.

“Carney më ka pëlqyer që në fillim dhe kemi pasur një marrëdhënie të mirë. Kemi një konflikt natyror. Gjithashtu kemi dashuri të ndërsjellë… e dini që kemi dashuri të madhe për njëri-tjetrin”, tha Trump për gazetarët, i ulur pranë Carney.

Trump vazhdoi duke thënë se të dy burrat do të diskutonin për uljen e mundshme të tarifave në sektorët kryesorë kanadezë, si pjesë e përpjekjeve për të lehtësuar tensionet tregtare midis Uashingtonit dhe Otavës.

Më shumë se 77 përqind e eksporteve të Kanadasë shkojnë në SHBA. Një zyrtar kanadez dhe disa analistë kanë minimizuar shanset e një marrëveshjeje midis 2 liderëve, duke thënë së fakti që po bisedohet është në vetvete një sukses për Carney.

Një temë mjaft e rëndësishme është edhe marrëveshja e tregtisë së lirë Amerikë-Meksikë-Kanada (USMCA), e miratuar gjatë mandatit të parë të Trump.

“Mund ta rinegociojmë, që do të ishte edhe gjëja më e mirë, ose mund të bëjmë marrëveshjë të reja”, tha Trump.

Ndryshe nga konsiderata që ka për Trudeau, presidenti Trump tha se pasardhësi i tij Carney është një lider botëror dhe një negociator mjaft i aftë. Në maj, Carney i kishte bërë të qartë Trump se Kanadaja nuk ishte në shitje, pas fjalëve të presidentit amerikan për ta aneksuar atë si shtet.

Që atëherë, Kanadaja ka bërë disa lëshime për partnerin më të madh tregtar të saj, duke përfshirë heqjen e disa kundër-tarifave dhe heqjen e një takse mbi shërbimet dixhitale për kompanitë amerikane të teknologjisë.

Ndërsa shumica e eksporteve të Kanadasë tashmë po hyjnë në SHBA pa tarifa sipas USMCA-së, tarifat e SHBA-ve kanë goditur sektorët e çelikut, aluminit dhe automobilave të Kanadasë, si dhe një numër biznesesh të vogla.

Mark Carney fitoi zgjedhjet në prill me premtimin që do të ishte i ashpër ndaj Trump në mbrojtje të politikave të Kanadasë. Edhe pse opozita ka kritikuar veprimet e tij në lidhje më SHBA-të, sondazhet tregojnë për një mbështetje të gjerë të qytetarëve kanadezë për Carney./CNA