web counter
LEXO PA REKLAMA!

SHKARKO APP

App Store
Google Play

E fundit!

x

Konjufca: Pa një qeveri të re vendi e ka të sigurt thellimin e krizës, duam të kursejmë dy palë zgjedhje

19 Nëntor 2025, 15:11, Kosova & Bota CNA

Konjufca: Pa një qeveri të re vendi e ka të sigurt thellimin e

Në fjalën e tij para deputetëve të Kuvendit, Glauk Konjufca tha se për herë të parë në jetën e tij parlamentare Kuvendi i Republikës nuk arriti ta legjitimojë me votë qeverinë e shtetit.

“Votimit të 26 tetorit i parapriu një krizë 6-mujore, e cila ishte rezultat i pamundësisë për ta zgjedhur kryetarin e Kuvendit. Viti 2025 do të mbahet në mend si një vit shumica e të cilit humb në përpjekje për themelimin e institucioneve tona kushtetuese, Kuvendit e Qeverisë”, tha ai.

Megjithatë, tha ai në fjalimin e tij, se viteve të fundit arritjet e Kosovës janë të mëdha.

“Po hyjmë ne vitin e pestë me rritje ekonomike mbi 4 për qind e disiplina fiskale po shkon duke u konsoliduar. Borxhi i jashtëm ndodhet në pikën e tij historikisht më të ulët, kurse mbledhja e brendshme e tatimeve bashkë me qarkullimin e bizneseve ka shënuar rritje enorme”, tha ai.

Foli për luftimin e bandave në veri që tha se janë luftuar me sukses strukturat e Serbisë të lidhura me krimin e organizuar e kontrabandën, kurse buxheti për mbrojtje tha se është katërfishuar.

“Në planin ndërkombëtar u mundësua lëvizja pa viza në zonën Shengen e erdhën po ashtu tri njohje ndërkombëtare, shumë të rëndësishme në Republikën e Kosovës. Këto janë bërë falë punës së mirë të qeverisë Kurti”, tha ai.

Konjufca tha se pa një qeveri të re, vendi ynë e ka të sigurt vetëm një gjë, thellimin e krizës aktuale.

“Përmes themelimit të kësaj qeverie, sot ne synojmë disa gjëra bazike për shtetin tonë. Së pari synojmë ta kursejmë Kosovën nga dy palë zgjedhje eventuale. Do të ishte arrogancë ta çonim vendin tonë drejt e në zgjedhje. Patëm zgjedhje në shkurt të këtij viti, dy raunde zgjedhjesh lokale në tetor e nëntor, tash nëse shkojmë në zgjedhje edhe në dhjetor, kush na garanton që do t’i shmangim ato edhe në mars. Nuk ka kurrfarë garancie, e nëse kjo ndodh institucionet duhet të jenë gjithmonë të përgatitura, ama për qytetarët tanë rraskapitëse, për KQZ-në një sfidë të cilën kurrë nuk e kanë provuar, kurse për taksat e popullit edhe 8 milionë të tjera të harxhuara pa arsye”, deklaroi Konjufca në fjalën e tij si mandatar i dytë.

Konjufca deklaroi se nëse dështon edhe kjo përpjekje, atëherë pashmangshëm shkohet në zgjedhje, por tha se secili duhet ta dijë se çka bart mbi supe, e këto janë përgjegjësi të ndryshme.

“Disa çështje që qeveria jonë do t’i trajtojë me urgjencë janë: Buxheti i shtetit për vitin 2026, miratimi i Planit të Rritjes së BE-së, disa marrëveshje të rëndësishme ndërkombëtare, ekzekutimi i pagave të punëtorëve të RTK-së, si dhe miratimi i buxhetit për komunat Prishtinë, Gjilan e Zubin Potok. Dua t'ua risjell në mendje po ashtu që unë po kërkoj nga ju diçka që ne vetë e kemi bërë në vitin 2020. Të gjithëve na kujtohet se si LVV e pati votuar buxhetin e qeverisë Hoti më 29 dhjetor të vitit 2020. Neve nuk na dukej ai buxhet i personit, Avdullah Hoti, por i shtetit të Kosovës. Edhe ne mund të mos e kishim votuar atë buxhet, ama do të bëheshim përgjegjës për një krizë nga e cila rrezikoheshin drejtpërdrejt të gjitha pagat e sektorit publik. Ne atëherë e bëmë dallimin mes asaj që ishte interes publik dhe betejë politike e përditshme”, deklaroi Konjufca./CNA

 





Lajmet e fundit nga