Sulmi në Pakistan/ Çfarë dihet deri tani

7 Maj 2025, 13:35, Kosova & Bota CNA

India nisi sulmet në Pakistan dhe në Kashmirin e administruar nga Pakistani. Ndërsa autoritetet pakistaneze pretendojnë se kanë rrëzuar pesë avionë të Forcave Ajrore Indiane për vetëmbrojtje. Gjë që solli një përshkallëzim të madh të konfliktit mes Indisë dhe Pakistanit.

Sulmet e ditës së sotme erdhën dy javë pasi disa turistë u vranë në Kashmir. Për vrasjen e turistëve India akuzoi Pakistanin, ndërsa ky i fundit i mohoi akuzat.

Por çfarë dihet deri tani për sulmet e Indisë?

Sulmet me raketa nga India shënjestruan “infrastrukturën terroriste” në 9 vende në provincën Punjab të Pakistanit dhe në Kashmir. Kryeministri pakistanez Shehbaz Sharif e përshkroi sulmin si "një akt lufte" dhe Islamabadi është zotuar të hakmerret.

Burimet ushtarake pakistaneze thanë se rrëzuan pesë avionë luftarakë të Forcave Ajrore Indiane. Një banor dhe zyrtar qeveritar i tha "CNN" se një avion luftarak i paidentifikuar ishte rrëzuar mbi një ndërtesë shkolle në Kashmirin e administruar nga India. Sipas asaj që raporton "Reuters", ushtria pakistance thotë se ka vrarë të paktën 26 civilë. Granatimet nga ushtria pakistaneze kanë vrarë të paktën tetë persona në anën indiane të vijës së kontrollit në Kashmir, tha një burim i lartë indian i mbrojtjes për "CNN".

Kryeministri i Indisë, Narendra Modi, ka kryesuar një takim me ministrat e lartë të kabinetit të tij pas sulmeve. Modi nuk ka folur publikisht që kur India nisi sulmet të mërkurën në mëngjes. Modi gjithashtu ka informuar Droupadi Murmu-n, presidentin e vendit, mbi veprimin e fundit ushtarak, sipas një postimi në llogarinë zyrtare "X" të Murmu-së. Pakistani me shumicë myslimane dhe India me shumicë hindu i janë afruar gjithnjë e më shumë konfliktit të hapur që kur persona të armatosur masakruan 26 persona në Kashmirin e administruar nga India muajin e kaluar, me qeverinë hindu-nacionaliste të Indisë nën presion të fortë nga baza e saj për t'iu përgjigjur sulmit.

Pakistani mohoi menjëherë çdo lidhje me sulmin, por në ditët në vijim, të dyja vendet i zbehën shpejt marrëdhëniet me njëri-tjetrin dhe që atëherë janë përfshirë në përshkallëzimin e armiqësive. Analistët thanë se ishte çështje se "kur", jo "nëse", do të hakmerrej India.

Aeroporti në Srinagar, qyteti më i madh i Kashmirit të administruar nga India, është mbyllur për trafikun civil dhe disa linja ajrore kanë pezulluar ose devijuar fluturimet drejt Pakistanit dhe Indisë veriperëndimore./ CNA